Lae-inkomste-inwoners van Otji moet huur betaal

Die munisipaliteit van Otjiwarongo het aangekondig inwoners van informele nedersettings sal voortaan huurgeld moet betaal. Hierdie stap word glo genoodsaak deur die behoefte om basiese dienste aan hierdie gebiede te verskaf en omdat geld hiervoor benodig word.Uit die betalings wat van dié woongebiede ingevorder word, sal 60% vir die opgradering en ontwikkeling van die informele nedersettings aangewend word, en 40% vir dorpsraadbedrywighede.Die huurooreenkoms is van toepassing op inwoners van al nege informele nedersettings van die dorp.Die aankondiging is tydens ’n gemeenskapsvergadering op 11 Junie gemaak, waar inwoners van blokke 1 tot 7 van die Eie Risiko-nedersetting toegespreek is. Die strategiese uitvoerende beampte van gemeenskapsontwikkelingsdienste, mnr. Erikson Mwayekange; voorsitter van die bestuurskomitee, mnr. Godhard Hoko en adjunkburgemeester Julienda Kampungu was by die vergadering teenwoordig.Die munisipaliteit het ’n konsep bekend as die versnelde grondleweringsproses (ALDP) geïnisieer en is in die proses om dit te implementeer. Hierdie konsep is gebaseer op die beginsels van parallelisme in die grondleweringsproses en kombineer verskillende programme, insluitend ’n buigsame grondbesitstelsel. ’n Sosioëkonomiese opname gebaseer op hierdie benadering om grondgrypery hok te slaan en grondlewering te bespoedig, is gedoen en deur die munisipaliteit aanvaar. Die opname het bevind die meerderheid van die broodwinners in informele nedersettings verdien ’n maandelikse inkomste van meer as N$2 000. Ongeveer die helfte van Eie Risiko se inwonersgetal val onder hierdie inkomstekategorie, asook 86% van die inwoners van uitbreiding 3 van die informele nedersetting DRC.Bekostigbaarheid is oorweeg en navorsing toon dat die inwoners in ’n posisie is om ’n lae fooi te betaal. Een bevinding was byvoorbeeld dat inwoners van Eie Risiko (blok 1, 2, 3, 4, 5) ’n maandelikse huurfooi van N$150 kan betaal.Me. Julia Seibes, ’n inwoner van dié gebied, het gesê: “Om te hoor van die maandelikse huurfooi is nie die beste nuus nie, maar die wete dat dit sal bydra tot die implementering van basiese dienste in ons gemeenskap gee ons hoop”.Bepalings van die huurooreenkoms sluit in dat geen permanente strukture sonder die raad se toestemming en goedkeuring opgerig mag word nie. Mwayekange het gesê: “As jy die kontant het, kan jy op jou eie bou mits jy ’n bouplan by die munisipaliteit indien, en bouplanne moet goedgekeur word.”Ander voorwaardes sluit in geen verhuring of onderverhuring van grond aan ’n derde party nie; geen voorbehoud van grond deur ’n natuurlike- of regspersoon nie; en geen uitvoering van sakebedrywighede of enige bedrywighede wat onder nie-residensiële kategorieë val, mag op residensiële gesoneerde erwe uitgevoer word sonder munisipale goedkeuring nie. Die betaaldatum is die 15de van elke maand en huurders wat meer as twee maande versuim om te betaal, verbeur outomaties die grond aan die munisipaliteit sonder vooraf kennisgewing. Verder is dit verbode om ’n erf te verkoop wat by wyse van die huurkontrak in ’n informele nedersetting beset is, en geen vee mag op die eiendom aangehou word nie. Otjiwarongo se informele nedersettings bestaan uit net meer as 4 700 huishoudings versprei oor nege woongebiede/uitbreidings – waarvan die grootste Eie Risiko met 1 466 huishoudings is. Die uitbreiding van informele nedersettings weerspieël die kritieke tekort aan bekostigbare behuising in die dorp.– republikein@republikein.com.na

Lae-inkomste-inwoners van Otji moet huur betaal

Kommentaar

Republikein 2026-03-19

Meld asseblief aan om kommentaar te lewer

Lae-inkomste-inwoners van Otji moet huur betaal

Kommentaar

Republikein 2026-03-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.