Hoofstad se fietsbane flop

NuusredaksieDie Duitse regering het ’n toelaag van 11 miljoen euro (sowat N$206 miljoen) onttrek wat bedoel was om Stad Windhoek te help om skoner vervoer te ontwikkel. Dít nadat ’n haalbaarheidstudie bevind het ’n voorgestelde fietsnetwerk sou te min gebruikers lok om aan die befondser se vereistes vir die vermindering van koolstofvrystellings te voldoen.Windhoek het probeer om die befondsing te behou deur ’n elektriese busprojek voor te stel, maar die Duitse regering het ook geweier om die alternatief te finansier, wat die munisipaliteit sonder geld vir enige van die twee inisiatiewe laat.Die toelaag is tydens onderhandelinge oor ontwikkelingsamewerking tussen Namibië en Duitsland in Oktober 2021 toegeken en sou via die Duitse ontwikkelingsbank, Kreditanstalt für Wiederaufbau (KfW), onder die Duitse klimaat- en tegnologie-inisiatief voorsien word.Die volhoubare stedelike mobiliteitsprojek vir Windhoek was bedoel om kweekhuisgasvrystellings te verminder, die doeltreffendheid van openbare vervoer te verbeter en die stad se oorgang na stedelike vervoer met laer koolstof te ondersteun.Die oorspronklike voorstel het die ontwikkeling van ’n nie-gemotoriseerde vervoernetwerk behels, insluitend fietsbane en infrastruktuur vir voetgangers, om inwoners aan te moedig om te stap en fiets te ry, eerder as om op gemotoriseerde vervoer staat te maak.Die stad het tussen November 2024 en April 2025 ’n haalbaarheidstudie gedoen om vas te stel of die voorgestelde netwerk genoeg gebruikers sou lok en koolstofvrystellings met die vlak sou verminder wat onder die Duitse meganisme vir klimaatfinansiering vereis word.Die studie het bevind dat die verwagte toename in fietsry en ander vorme van nie-gemotoriseerde vervoer aansienlik laer sou wees as wat aanvanklik geprojekteer is. Die verwagte vermindering in die vrystelling van koolstofdioksied het ook onder die befondser se vereiste drempel gebly.Die Duitse regering het Windhoek daarna gevra om ’n alternatiewe projek voor te stel wat aan die vereistes vir klimaatsimpak kon voldoen en voldoende ontwikkel kon word vir beoordeling voordat die toelaag verval.ELEKTRIESE BUSSEWindhoek het einde Oktober 2025 ’n voorstel vir elektriese busse ingedien. KfW het die voorstel nagegaan en verdere gesprekke met die munisipaliteit en die Ontwikkelingsbank van Namibië (DBN) gevoer, maar die Duitse regering het uiteindelik die toelaag teruggetrek.Die raad het gehoor die oorspronklike voorstel vir infrastruktuur is op 14 Augustus 2025 teruggetrek, waarna die munisipaliteit genooi is om ’n alternatief in te dien.“Hulle het ons versoek om vir hulle ’n alternatiewe projek te gee waarna hulle kan kyk, wat ons toe ingedien het. “Dit is met daardie projek wat hulle nou teruggekom het en gesê het hulle kan nie meer daarmee voortgaan nie,” het die amptenaar gesê.KEGELSRaadslid Kavetu Maitjituavi het die onttrekte befondsing verbind met Windhoek se bestaande fietsbane wat met kegels afgebaan is. Hy het gesê die stad het elektriese busse voorgestel nadat daar tot die gevolgtrekking gekom is dat die fietsprojek nie haalbaar is nie.Hy het gesê die kegels is deur lede van die publiek verwerp en aangevoer dat gesprekke waarby DBN, die sentrale regering en die munisipaliteit betrokke is, moet voortgaan om te bepaal of ’n elektriese busdiens deur ’n ander reëling gefinansier kan word.“Ons het ook gesien die kegels is deur die massas verwerp,” het Maitjituavi gesê.Raadslid Ignatius Semba, wat ná Maitjituavi gepraat het, het die voorwaardes wat aan die Duitse toelaag gekoppel is, gekritiseer en aangevoer dat ontwikkelingsvennote plaaslike owerhede groter invloed moet toelaat oor hoe befondsing gebruik word.Semba het gesê Windhoek se padveiligheidsomstandighede en vervoervereistes verskil van dié in Europese stede, wat dit moeilik maak om ’n fietsmodel in te voer sonder om dit by plaaslike omstandighede aan te pas.Hy het gesê raadslede het reeds toe die voorgestelde nie-gemotoriseerde vervoerinisiatief aanvanklik voorgelê is, hul kommer oor die veiligheid en haalbaarheid daarvan geopper, veral omdat fietsryers en voetgangers steeds aan motorvoertuie blootgestel word.“Ons het gesê hierdie ding is nie hier haalbaar nie,” want volgens Semba word die veiligheid van fietsryers en voetgangers nie bevorder nie.Hy het aangevoer dat die stad probeer het om die beskikbare befondsing na ’n projek te herlei wat dit as beter geskik vir plaaslike behoeftes beskou, maar dat die toelaag se voorwaardes sy vermoë om dit te doen, beperk het.“As die Duitsers ons regtig as ’n plaaslike owerheid wil help om sommige hiervan te implementeer, moet hulle hierdie verborge voorwaardes verwyder,” het Semba gesê.Alhoewel albei inisiatiewe deel gevorm het van die stad se breër nie-gemotoriseerde vervoerprogram, was die bestaande kegel-afgebakende fietsroete en die voorgestelde KfW-befondsde netwerk afsonderlike projekte wat deur verskillende reëlings gefinansier is.Die bestaande korridor was ’n kleiner loodsprojek wat die Universiteit van Namibië (Unam) se Khomasdal-kampus met die Namibië Universiteit vir Wetenskap en Tegnologie (Nust) se hoofkampus verbind. Die Duitse ontwikkelingsagentskap GIZ het dit gefinansier en Ndakalimwe Investments het dit vir net onder N$1,5 miljoen gebou.Konstruksiewerk het in Augustus 2021 begin tydens Job Amupanda se termyn as burgemeester en het sypaadjieverbeterings, padmerke en rooi kegels ingesluit wat fietsryers van motorvoertuie skei.Stad Windhoek het in 2024 gesê die Duitse ontwikkelingsamewerking het die loodsprojek ten volle befonds en dat dit die munisipaliteit niks gekos het nie.Teen daardie stadium is 230 beskadigde kegels vervang teen ’n aangeduide koste van meer as N$78 000.– republikein@republikein.com.na

Hoofstad se fietsbane flop

Kommentaar

Republikein 2026-09-01

Meld asseblief aan om kommentaar te lewer

Hoofstad se fietsbane flop

Kommentaar

Republikein 2026-09-01

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.