Groot Aub se krane loop weer

Elizabeth Beukes (58) was Vrydagoggend verheug om weer haar wasgoed by haar huis op Groot Aub te kan was waar sy saam met baie van haar bure maande se watertekorte verduur het.Vermoedelik was onwettige waterverbindings glo gebruik om water vir die verkoop aan inwoners op te gaar en so ook die mark te versterk deur die waterdruk te verminder en baie huishoudings geheel en al sonder watertoevoer te laat. Vir ‘n duisend liter water moes inwoners glo tot N$200 op straat opdok. Donderdag het ‘n span vanaf Windhoek ingetree.Groot Aub val onder die jurisdiksie van die hoofstad en Stad Windhoek se hoofwoordvoerder Lydia Amutenya beklemtoon: “Tans word geen individu of entiteit toegelaat om water te verkoop nie.” Sy verwys na die Wet op Plaaslike Regering, nommer 23 van 1992, wat die verskaffing van water sonder goedkeuring strafbaar maak met 'n boete van N$1 000. Onwettige aansluiting op die hoofwaterpyplyn behels ook 'n boete van N$1 000, tesame met 'n boete van N$1 000 vir die beskadiging van 'n waterpyplyn en vir dade wat kan lei tot die beskading van watervoorsiening.“Tydens 'n onlangse gesamentlike besoek deur stadsamptenare en die stadspolisie, is daar gevind dat sommige gemeenskapslede inwoners laat betaal vir die vervoer en aflewering van water. Die onwettige waterpunt wat tydens hierdie besoek geïdentifiseer is, is ontkoppel,” het Amutenya gesê.Inwoners van Groot Aub ontvang gratis water, maar die onbeplande bevolkingsaanwas sedert 2017, toe die nedersetting binne Windhoek se grense val, is die hoofrede vir die onderbrekings in die watertoevoer. “Die huidige stelsel is oorspronklik ontwerp vir 'n kleiner bevolking, en die verhoogde vraag het aansienlike druk op die bestaande infrastruktuur geplaas,” sê Amutenya. “Weens die topografie van die gebied, kry laeliggende gebiede ononderbroke watertoevoer terwyl hoogliggende gebiede onderbroke toevoer ervaar. Om dit te versag, beplan die stad om ‘n beurtwatervoorsieningstelsel te gebruik om te verseker alle gebiede kry op geskeduleerde tye water,” sê sy.Verder word daar beplan om dalk water vanaf die Oanobdam na Groot Aub te bring, waarvoor NamWater genader is om ondersoek in te stel, sê sy. BOORGATEOm die voorsieningskapasiteit te verdubbel, is vier bykomende produksieboorgate geboor, terwyl die beplanning en konstruksie van nuwe reservoirs, met die koppeling van waterpype aan die verspreidingsnetwerk, binne die volgende twee jaar onderneem sal word, sê sy. Sewe boorgate is tans in werkende toestand, met vyf wat gelyktydig gebruik word om die nedersetting se waterbehoeftes te handhaaf en een wat boerderydoeleindes ondersteun.“Die stelsel is tans opgestel om ongeveer 10 000 inwoners van water te voorsien, wat gelykstaande is aan ongeveer 1 000 kubieke meter water per dag. Die vraag oorskry egter die aanbod as gevolg van bevolkingsgroei en verhoogde waterverbruik,” sê Amutenya.Sy sê die meerderheid van die boorgate en die twee hooftoevoerlyne is redelik nuut en in 'n goeie toestand, hoewel baie van Groot Aub se waterinfrastruktuur nie aan die Stad Windhoek se standaardspesifikasies voldoen nie. Laedruk-uitdagings word ondervind as gevolg van die hoë aanvraag, voeg sy by. “Die stad beraam dat ongeveer N$110 miljoen benodig sal word om dele van Groot Aub se watervoorsieningsinfrastruktuur op te gradeer en te vervang om aan die vereiste standaarde te voldoen,” sê sy. Inwoners word versoek om wateronderbrekings en vermoedelike onwettige verbindings onmiddellik aan te meld. Skakel die stadspolisie se tolvrye nommer by 061 302302 of stuur ‘n SMS aab 4444.- augetto@nmh-hub.com.na

Groot Aub se krane loop weer

Kommentaar

Republikein 2026-01-15

Meld asseblief aan om kommentaar te lewer

Groot Aub se krane loop weer

Kommentaar

Republikein 2026-01-15

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.