Elisenheim kry spoggerige padelbane

Die gemeenskap op die Elisenheim-landgoed noord van Windhoek is ’n noue, diverse gemeenskap waar inwoners draf, met hul honde stap of kinders sorgeloos met hul fietse in die strate ry. 

Die gemeenskap is sosiaal, help mekaar in tye van nood en het selfs ’n geldisamelingsveldtog vir die vriendelikste sekuriteitswag by die ingang gehou en hom met ’n fiets, selfoon en komberse beloon.

Op Elisenheim is ’n Spar-winkel onder nuwe eienaarskap, restaurante, ’n skoonheidsalon, kerk, gimnasium, staproetes en braaiplekke by die dam, ’n skool, kindergarten en naskoolse sentrum, ’n apteek, asook ’n mediese en veeartspraktyk. 

Sportiewe inwoners kry nou nóg ’n bonus met spoggerige padelbane.     

 Elisenheim Lifestyle Estate het in vennootskap met Urban Village, Holms Construction en landgoedinwoners begin met die konstruksie van Elisenheim Padel, nuwe sportgeriewe wat twee padelbane op internasionale standaard naby die landgoed se winkel- en leefstylsentrum.

Die ontwikkeling, wat in Mei 2026 voltooi sal wees, vorm deel van die landgoed se breër visie om ’n aktiewe, sosiale gemeenskapsomgewing te bou waar inwoners en besoekers aan sport kan deelneem.

Volgens Le-Hugo van Rooyen, uitvoerende hoof van APxHouse Property Development Holdings (Pty) Ltd, weerspieël die bekendstelling van Padel beide die veranderende aard van moderne residensiële ontwikkelings en die vraag na sosiale sport. 

"Padel het ’n unieke vermoë om mense byeen te bring. Dit is toeganklik, stadiger en inherent sosiaal, wat dit geskik maak vir ’n residensiële omgewing soos Elisenheim," het Van Rooyen gesê. 

"Soos die sport steeds momentum in Namibië kry, sien ons dat hierdie geriewe ’n plek word waar inwoners en besoekers op en van die baan sosiaal verkeer terwyl dit die gevoel van gemeenskap versterk waarvoor die landgoed bekend is."

Padel, wat wyd beskou word as die vinnigste groeiende raketsport ter wêreld, het die afgelope paar jaar aansienlik uitgebrei met meer as 30 miljoen spelers in byna 150 lande en ’n geraamde 70 000 bane wat wêreldwyd teen die einde van 2026 verwag word. 

Namibië het hierdie tendens weerspieël met die sport wat sterk momentum in Windhoek en ander dorpe kry namate nuwe geriewe oopmaak en plaaslike deelname aanhou groei.

Die projek sal twee professionele buitebane insluit, gebou volgens internasionale standaarde met behulp van glasomhulselstelsels en gespesialiseerde kunsmatige gras om beide mededingende en ontspanningspel te ondersteun. 

Sterk LED-spreiligte sal aandwedstryde moontlik maak, wat speelure aansienlik verleng en inwoners toelaat om saans ook aktief te wees. 

"Soortgelyk aan moderne padelgeriewe wêreldwyd, sal die bane deur ’n digitale besprekingsplatform werk, wat spelers in staat stel om bane te bespreek, wedstryde te organiseer en speelskedules deur ’n mobiele toep te bestuur," sê Van Rooyen.

Hy sê die nuwe bane sal integreer met die landgoed se bestaande geriewe, insluitend parkeerareas, voetgangertoegangspunte en omliggende sosiale ruimtes, wat ’n natuurlike uitbreiding van die landgoed se infrastruktuur vir ontspanning vorm.

Die ligging van die bane is volgens Van Rooyen ook beplan met potensiaal vir toekomstige uitbreidings, wat toelaat dat bykomende bane ontwikkel kan word indien die vraag na die sport aanhou groei.

– [email protected]