‘Ek is ’n Kwambi’

Opknappingswerk aan die brug wat Osona Village met die Osona-militêre basis verbind, word steeds vertraag.

Dié brugprojek sou na verwagting net ses maande duur.

Die minister van werke en vervoer, Veikko Nekundi, het gewaarsku hy sal die voortgesette vertragings by die Osona-brug persoonlik aanpak en uitstryk. 

“Moenie my optrede blameer as ek soontoe gaan en daar is geen vordering nie, ek is ’n Kwambi,” het hy gemaan. Nekundi was Woensdag aan die woord tydens die amptelike bekendstelling van die Paaieowerheid (RA) se projekbeheerstelsel (PCS).

Die stelsel van N$13 miljoen is ’n digitale platform wat ontwerp is om projekvertragings, stygende koste en risiko’s vir implementering te identifiseer. Die projek het ten doel om die regering intydse moniterig oor padprojekte te bied.

Nekundi het gesê hy is deur besorgde inwoners en motoriste genader oor die brug wat Osona Village en die Osona-militêre basis verbind. Die klagtes duur reeds langer as ’n jaar voort. 

“Ek is in April verlede jaar meegedeel dit sal ongeveer ses maande neem en dat alles voltooi sou wees. Dit is nou meer as ’n jaar later en inwoners van Osona kla steeds oor die brug, niks gebeur nie,” het Nekundi gesê.

Volgens die minister beplan hy om binnekort self die terrein te besoek om die stand van die projek te bepaal.

Die RA bestuur een van Namibië se grootste openbare bates – ’n nasionale padnetwerk van byna 50 000 kilometer ter waarde van ongeveer N$220 miljard.

Die nuwe PCS het ten doel om die monitering van die land se reuse-padnetwerk te versterk. Dit sluit begrotings vir projekte, uitgawes, skedules vir implementering, data oor vordering en prestasie in, wat op ’n enkele geïntegreerde platform beskikbaar is. 

Volgens Nekundi behoort die stelsel die regering in staat te stel om in te gryp voordat padprojekte in “duur probleme” ontaard.

“Ek hoop nie ek sal weer sulke oproepe ontvang sodra die stelsel in werking gestel is nie,” het hy gesê. 

Die minister het RA-amptenare aangespoor om ten volle van die nuwe tegnologie gebruik te maak en hom nie net te bel wanneer probleme opduik ​​nie.

“Ek weet hulpbronne is beperk, maar ons moet al ons vermoëns en pogings aanwend om te verseker dat die stelsel optimaal benut word. Alles wat nadelig vir die goeie toestand van ons paaie is, moet ten alle koste voorkom word,” het Nekundi gemaan.

Volgens die RA sal die stelsel projekte tydens hul volle duur monitor en inligting deur middel van mobiele verslagdoening en kartering verskaf. 

Sodra die stelsel ten volle in bedryf is, sal die opsomming van inligting oor die projek ook aan gemagtigde rolspelers, insluitend regeringinstellings, streekowerhede, staatsondernemings, kontrakteurs en konsultante vrygestel word. 

Die verwagting is dat dit besteding aan openbare infrastruktuur makliker naspeurbaar sal maak en aanspreeklikheid met betrekking tot die gebruik van belastingbetalers se geld sal versterk. 

Volgens Nekundi moet vertraagde instandhouding nie bloot as uitgawes hanteer word nie. Hy het gewaarsku dat die uitstel van instandhouding uiteindelik die koste vir padgebruikers en die breër ekonomie verhoog.

Die RA se statutêre mandaat ingevolge die Padowerheidswet van 1999 is om Namibië se nasionale padnetwerk te bestuur sodat dit veilig en doeltreffend is. 

Nekundi het egter gemaan dat tegnologie alleen nie Namibië se uitdagings met infrastruktuur sal oplos nie.

“Die projekbeheerstelsel sal net so doeltreffend wees soos die mense wat dit gebruik en die gehalte van die data wat ingevoer word,” het die minister gesê. 

Die stelsel vereis dat projekbestuurders, ingenieurs, beplanners, finansiële amptenare en kontrakbestuurders akkurate en tydige inligting verskaf.

Volgens Nekundi sal sy beplande besoek aan die Osona-brug die eerste geleentheid bied om hom ter plaatse oor die huidige stand van sake in te lig. 

“Ek gaan optree, dit moet as ’n prioriteit aangepak word,” het Nekundi beklemtoon.

– [email protected]