Behuisingsteikens te ambisieus?

Met minder as ’n jaar oor voor Stad Windhoek (CoW) se strategiese plan vir 2022-’27 tot ’n einde loop, duik vrae op of die munisipaliteit op koers is om sy ambisieuse teikens vir behuising en die lewering van nutsdienste te haal.

Die hoofstad se strategiese plan skets voornemens om jaarliks honderde residensiële erwe te diens en die konstruksie van bekostigbare behuising uit te brei. 

Dit vorm deel van pogings om Windhoek se groeiende behuisingsvraag en die uitbreiding van informele nedersettings te takel.

Volgens die verslag het die munisipaliteit ’n teiken gestel om jaarliks 700 erwe in onontwikkelde (greenfield)-ontwikkelings te diens, terwyl projekte vir ontwikkelings waar die grond voorheen vir nywerheids- of kommersiële doeleindes gebruik is (brownfield developments) oor bestaande gebiede geleidelik uitgebrei sou word. Die plan het verder voorsien dat laasgenoemde ontwikkelings in latere jare van die strategie tot soveel as 3 150 gedienste erwe kan bereik, veral in gebiede soos Groot Aub, Havana, Otjomuise, Goreangab en die Mix-nedersetting. 

Benewens die lewering van nutsdienste, het die strategie ook teikens gestel om bekostigbare behuising uit te brei, wat deur die raad ondersteun word.

Die korporatiewe telkaart in die verslag dui daarop dat die konstruksie van behuising, ondersteun deur die raad, na verwagting bestendig sou groei en teen die 2026-’27-boekjaar tot sowat 600 huise sou bereik.

’n Ander program wat op informele nedersettings gemik is, het voorsiening gemaak vir die lewering van sowat 300 bekostigbare huise per jaar in onder meer Havana, Otjomuise en Groot Aub.

Die verslag lui dat hierdie inisiatiewe onder CoW se breër doel val om “basiese dienste, grondlewering en die opgradering van informele nedersettings” te verskaf, as deel van pogings om inwoners se lewensgehalte te verbeter. 

Met 2027 om die draai, hersien die munisipaliteit tans die vordering wat onder die vyfjaarstrategie gemaak is.

CoW se woordvoerder, Lydia Amutenya, het gesê die munisipaliteit is tans besig om die implementering van die plan te evalueer. 

“Die hersiening is tans aan die gang en die opdatering kan verskaf word sodra dit afgehandel is,” het sy gesê.

Die strategiese plan is ontwerp as ’n bloudruk wat die munisipaliteit se prioriteite vir dienslewering en die ontwikkeling van infrastruktuur tussen 2022 en 2027 lei. Dit bring ook CoW se ontwikkelingsagenda in lyn met nasionale raamwerke soos Visie 2030, die vyfde nasionale ontwikkelingsplan (NDP5) en die Harambee-welvaartsplan II.

Onder die prioriteite is die opgradering van informele nedersettings, die installering van gemeenskaplike infrastruktuur vir water en sanitasie en die uitbreiding van basiese dienste en padnetwerke in groeiende woongebiede. 

Windhoek het die afgelope dekade vinnige verstedeliking beleef, wat toenemende druk op die behuisingsaanbod, die beskikbaarheid van grond en munisipale dienste plaas.

Die hoofstad se strategiese plan identifiseer die lewering van behuising, die opgradering van informele nedersettings en die uitbreiding van basiese dienste as sleutelfaktore om op dié druk te reageer.

– [email protected]