Wu hof toe gesleep oor N$24 miljoen

Jemima Beukes – Die Chinese sakemagnaat, Stina Wu, het na bewering versuim om N$24 miljoen te betaal vir eiendomme wat sy ingestem het om van Esmerelda Boa-Hora Manahi te koop. Manahi eis ook N$2,1 miljoen vir die huur van die eiendom vir ’n tydperk van 21 maande.Manahi versoek die hof om Wu te beveel om die eiendomme te ontruim, asook om die eiendom te herstel. Sy beweer grootskaalse skade is aan die eiendom aangerig terwyl dit deur Wu beset is, wat gelei het tot ’n aansienlike daling in die waarde van die eiendom van sowat N$13 miljoen.In hofstukke beweer Manahi dat sy op 26 Oktober 2018 ’n verkoopooreenkoms met Wu aangegaan het, wat ingestem het om haar ledebelange in Aquarius Investments te koop. Wu het na bewering ingestem om Manahi binne 40 dae van ’n eiendomswaarborg van N$9,5 miljoen te voorsien en die oorblywende bedrag sou in maandelikse paaiemente van N$104 166 betaal word. Wu sou ook toegelaat word om die eiendom vanaf die eerste paaiement te beset.Manahi het gesê Wu sou alle munisipale tariewe en belasting betaal vanaf die datum van okkupasie, en dat die eiendomme in November 2019 op Wu se naam oorgedra sal word sodra sy die bankwaarborg ontvang het.Wu het egter na bewering misluk om die munisipale tariewe en belasting te betaal en het glo ook nie die bankwaarborg gelewer nie.“Sedert November 2018 tot vandag is toegang tot die eiendomme onder Wu se beheer, aangesien die hoofhek vasgeketting en gesluit is. Sedert November 2018 gebruik Wu die eiendomme om sommige van haar werknemers van die Marigold Hotel te akkommodeer, voertuie en konstruksievoertuie te parkeer en om konstruksiemateriaal en rommel op en af te laai. Die eiendomme is gevandaliseer en beskadig. Die deure, vensters, hekke, vloere, plafonne, toilette, drade, skakelaars, proppe, wasbakke, teëls en geisers is stukkend of weg. Hierdie eiendomme was vroeër baie mooi en nou is dit verwoes en lelik,” het sy gesê.VRIENDSKAPMahani se man, Rafid Manahi, het gesê hy is in 2017 met Parkinson se siekte gediagnoseer en hulle beplan om hulle eiendomme te verkoop om al hul uitstaande skuld te delg en oorsee af te tree, waar hy toegang tot die beste behandeling kan kry.Hy sê die eiendomme is in 2016 gewaardeer vir onderskeidelik N$17,7 miljoen en N$15 miljoen.“Wu wou ’n luukse Chinatown en toerismespilpunt bou waarna sy later as ‘Gala Square’ verwys het, wat wooneenhede en luukse winkels insluit. Ná verskeie vergaderings met Wu by die Marigold Hotel het ek en my vrou ingestem om albei eiendomme vir N$24 miljoen – N$12 miljoen per eiendom – aan Wu te verkoop. Ons was oortuig om op bedrae laer as waardasie te skik omdat sy ons verseker het dat die laer bedrag sou verseker dat die verkoopstransaksie vinniger afgehandel sou word,” het Rafid gesê.Volgens die egpaar het hul geglo hulle het ’n vriendskapsband met Wu.“Sy het ons verskeie kere na die Marigold Hotel genooi om funksies, etes en haar verjaardagpartytjie by te woon.”Rafid, het gesê dat hy sy vrou na vergaderings met Wu vergesel het weens laasgenoemde se “kontantvloeiprobleme wat onder druk geplaas is” en die koopprys van N$24 miljoen is nooit betwis nie.Hy het verder beweer dat Wu ’n skulderkenning onderteken het as sekuriteit vir betaling van N$5 miljoen na die eerste paaiement van N$208 333 in November 2018.“Wu het voortgegaan om die verskuldigde maandelikse betalings van N$208 333 ingevolge die akteverkoping te maak, maar kon egter nie finansiering binne die 40 dae-tydperk bekom nie en die verkoopsooreenkoms moes gekanselleer word. Wu het ons egter gesmeek vir meer tyd. “In Mei 2019 het sy ons ingelig dat daar vertragings was om die finansiering van N$19 miljoen te bekom – sy bou honderde huise in Rundu en bankwaarborge van die kopers van hierdie huise het stadiger inkom as wat verwag is. Sy het my vrou gevra om haar toestemming te gee om die Gala Square-projek te begin bemark en om met hersonering te begin, in ruil daarvoor het sy ingestem dat sy geen deel van die bestaande eiendom sou sloop voor die oordrag nie geregistreer is nie.”Intussen is hulle gedwing om prokureurs te nader toe dit blyk dat Wu nie die munisipale tariewe en belasting betaal het nie en dit het gelei tot die oorhandiging van die beslote korporasie (cc) aan Stad Windhoek (CoW) vir skuldinvordering.Wu, het na bewering in April 2021 N$300 000 betaal, maar het glo sedertdien geen verdere betalings gemaak nie.‘EK HET NIE’Wu het aan die hof gesê dat sy geen ooreenkoms verbreek het nie.“Vandat ek die verkoopsooreenkoms aangegaan het, het ek ywerig gepoog om leningsfinansiering by plaaslike banke te bekom. Die tyd wat ingevolge hierdie twee ooreenkomste gegun is, het albei verval en ek het steeds geen leningsfinansiering gekry nie. “Ek was gretig om die eiendomme te koop. Ek het Manahi en haar man gereeld gesien en hulle op hoogte gehou van die vordering van my finansiering.”“Ek het ’n jaar lank die ooreengekome maandelikse paaiemente van N$5 miljoen betaal, ten spyte daarvan dat die ooreenkomste teen daardie tyd verval het. Gedurende Maart 2021 het Helmsman Group ingestem om my as koper te vervang en Manahi het ingestem. Bankwaarborge is gebruik en die transaksies was gereed om voort te gaan. Sy het die transaksies in die wiele gery deur op agterstallige rentebetalings aan te dring. Ek het geweier aangesien ons ooreengekom het dat die koper vervang sou word en het nie ooreengekom oor agterstallige rente wat opgeloop het nie. Die transaksies het gevolglik misluk.” – republikein@republikein.com.na

Wu hof toe gesleep oor N$24 miljoen

Kommentaar

Republikein 2026-02-03

Meld asseblief aan om kommentaar te lewer

Wu hof toe gesleep oor N$24 miljoen

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.