Werknemers sleep hoof van NDF hof toe

Tien werknemers van die ministerie van verdediging en veteranesake het die hoof van die Namibiese weermag (NDF) hof toe gesleep.Die werknemers beweer dat hul akademiese kwalifikasies vereis dat hulle vergoed moet word. Besonderhede van hul verklaring verskil egter van die hoof van weermag se amptelike siening. “Militêre personeel met akademiese kwalifikasies word volgens die openbare administrasiemaatreëls vergoed mits hulle werk in die departemente wat die beste vir hul kwalifikasies geskik is,” stel die werknemers in hofstukke.“Hierdie voorstelling is deur die hoof van weermag gemaak en die voorstelling was duidelik en ondubbelsinnig. Dit het dus ’n regmatige verwagting geskep dat die eiser ook op grond hiervan sou baat.Hulle beweer die weermag het op 28 April 2021 hierdie maatreël verander, maar dat hulle reeds hul kwalifikasies behaal het voordat die besluit geneem is. Volgens hulle word teen hulle gediskrimineer, want hul kollegas word steeds op grond hiervan vergoed.“Die skeiding van die eisers van daardie werknemers wat voordeel trek en voortgaan om voordeel te trek, is ’n blatante daad van partydigheid.”NDF-HOOF ONTKEN MAATREËLDie hoof van die weermag beweer in sy pleitstukke dat só ’n maatreël nie bestaan nie en hy ontken dat hy ooit ’n verwagting geskep het dat die werknemers op dié grondslag vergoed sou word.“Die verweerder pleit dat dit algemeen is dat militêre personeel volgens die militêre salarisstruktuur vergoed word ten spyte daarvan dat hulle die akademiese kwalifikasies verwerf het wat op hul diensstasie betrekking het,” lui die pleitstukke.Hy pleit dat die maatreël reeds op 6 Desember 2016 deur die bestuur herroep is en nie op 28 April 2021 soos wat die betrokke werknemers beweer nie.EISEDie werknemers eis dat die hoof van die weermag se besluit wat op 28 April 2021 geneem is, tersyde gestel moet word. Hulle eis verder dat hul salarisse aangepas word, nes dié van hul kollegas, óf dat hulle bevorder moet word tot die rang van luitenant, nes die geval met prokureurs en dokters.Die werknemers eis ook terugbetaling wat terugdateer tot die datum waarop hulle in hul huidige posisies aangestel is.BEMIDDELING ONSUKSESVOLDie saak is aanvanklik deur die hoërhof in Windhoek na gefasiliteerde bemiddeling verwys, wat egter onsuksesvol was. Die partye het gister voor regter Eileen Rakow vir verdere saakbestuur verskyn.AKADEMIESE KWALIFIKASIESDie kwalifikasies van die tien werknemers sluit in baccalaureusgrade in menslike hulpbronbestuur, bemarking en sake-administrasie, asook joernalistiek en kommunikasie.Een van die werknemers het ’n graad in logistiek en voorsieningskettingbestuur en een het ’n diploma in rekenaaringenieurswese.– kristien@republikein.com.na

Werknemers sleep hoof van NDF hof toe

Kommentaar

Republikein 2025-08-05

Meld asseblief aan om kommentaar te lewer

Werknemers sleep hoof van NDF hof toe

Kommentaar

Republikein 2025-08-05

Meld asseblief aan om kommentaar te lewer

MELD AAN

Advertensie