Walvisbaai se slaggate in hof

’n Betwiste tender vir die herstel van slaggate op Walvisbaai het nou in die hoërhof gaan draai, met ’n onsuksesvolle bieër wat die munisipaliteit probeer keer om die kontrak in werking te stel. Vultune Investments CC het ’n dringende aansoek ingedien teen die openbare hersieningspaneel vir verkryging, sy voorsitter, die munisipale raad van Walvisbaai, DJJ Investment CC, JV Ehangano Building Construction en ander bieërs wat met die tender verbind word. Die tender het betrekking op die herstel van slaggate en bykomende werke binne die hawedorp se munisipale gebied.Die dispuut kom teen die agtergrond van toenemende kommer oor die toestand van paaie in Walvisbaai, veral op roetes wat gebruik word deur swaarvoertuie wat na en van die hawe, nywerheidsgebiede en visfabrieke beweeg. Die dorp se hoofpaaie het herhaaldelik klagtes van motoriste en besighede ontlok.Volgens hofdokumente wil Vultune hê dat die hoërhof die munisipaliteit verbied om die toekenning hangende die finalisering van ’n hersieningsaansoek te implementeer.Die maatskappy poog ook om die hersieningspaneel se besluit van 13 Mei 2026, die munisipaliteit se besluit van 20 April 2026 om sy heroorwegingsaansoek van die hand te wys en die kennisgewing van 2 April 2026 wat die suksesvolle bieër kies, te hersien en tersyde te stel.Die dispuut draai om of Vultune aan ’n verpligte vereiste voldoen het wat bepaal dat bieërs toegang tot kontant- of kredietfasiliteite van ten minste N$200 000 moet toon.Die munisipaliteit se standpunt, aldus die dokumente en ’n bron vertroud met die hantering van die tender, is dat Vultune tydens die voldoeningsfase gediskwalifiseer is omdat een van die ingediende dokumente nie aan die vereiste standaard voldoen het nie.Volgens die bron was die evaluering van die tender gebaseer op tegniese en finansiële kriteria met tegniese voldoening wat 70% weeg en finansiële prysbepaling 30%.Die bron het gesê ’n bieër wat nie die basiese voldoeningsfase gehaal het nie, sal nie verder geëvalueer word nie, selfs al lyk die prys mededingend.Dieselfde bron het gesê die tender moet nie as ’n vaste kontrakwaarde beskou word nie, aangesien die werk op eenheidstariewe gebaseer is. Kontrakteurs word betaal volgens die tipe en volume herstelwerk van slaggate wat uitgevoer word. Dit beteken die finale bedrag kan hoër of laer wees, afhangende van die werk wat gedoen is.Vultune hou vol dat sy bod laer was as dié van die suksesvolle bieër. ’n Regsbron vertroud met Vultune se saak het die suksesvolle bod op ongeveer N$1,7 miljoen en Vultune se bod op ongeveer N$1,5 miljoen geraam. Die munisipale bron sê egter die finale waarde sal afhang van die werklike werk wat verrig word.Die regsbron het gesê die maatskappy se standpunt is dat hy gediskwalifiseer is op grond van ’n rede wat die maatskappy glo nie toelaatbaar was onder die evalueringskriteria nie.Volgens die bron het Vultune ook beswaar gemaak teen die munisipaliteit wat met die toekenning voortgaan. Dit nadat hulle in kennis gestel is dat die saak na die hoërhof geneem gaan word.Die munisipaliteit staan die dringende aansoek teen. Hulle voer aan die saak is nie dringend nie, enige dringendheid deur gebeure oorskadu is, Vultune nie ’n prima facie-reg getoon het nie en dat hulle ander remedies het.Die munisipaliteit sê die tenderproses het ontstaan uit die verslegtende toestand van paaie op Walvisbaai, wat volgens hulle inwoners, besighede, toeriste en padgebruikers raak.Volgens die munisipaliteit se betooghoofde is die tender op 17 Februarie 2026 geadverteer en het op 3 Maart 2026 gesluit. Veertien bieërs het tenders ingedien. Volgens Vultune se betooghoofde het die munisipaliteit hulle op 21 Mei in kennis gestel dat ’n kennisgewing van toekenning op 20 Mei aan die suksesvolle bieër gestuur is en die kontrak op 21 Mei onderteken is. Dieselfde dokument lui dat die vierde respondent na bewering op 25 Mei die perseel betrek het.Vultune ontken dat die saak akademies geword het en voer aan dat die kontrak steeds gestop kan word hangende die hersiening.Die saak dien voor regter Lotta Ambunda in die hoërhof in Windhoek. – adam@erongo.com.na

Walvisbaai se slaggate in hof

Kommentaar

Republikein 2026-09-10

Meld asseblief aan om kommentaar te lewer

Walvisbaai se slaggate in hof

Kommentaar

Republikein 2026-09-10

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.