Vyf in aanhouding ná man spoorloos verdwyn

Vyf mans is in hegtenis geneem en het almal verlede week in die hof verskyn in verband met die verdwyning van Matheus Sheehama.Hy is laas op Saterdag 27 Julie gesien by ’n braai by sy meisie se huis. Hy is na bewering deur die vyf verdagtes by die braai aangerand en word intussen vermis. Sheehama is ’n 24-jarige student aan die Universiteit van Namibië (Unam). Die polisie het vier verdagtes – Jimmy Gaeb (24), Marvin Wapota (20), Romano Paulus (20) en Enrico Gomachab (20) – in verband met die beweerde aanranding in hegtenis geneem. Dié verdagtes het reeds vroeër verlede week hul eerste verskyning in die landdroshof op Walvisbaai gemaak. ’n Vyfde verdagte, Michael Awaseb (24), is einde verlede week in hegtenis geneem en het Vrydag sy eerste hofverskyning gemaak.Volgens die polisie se hoofinspekteur in die Erongostreek, Ileni Shapumba, het Matheus voor sy verdwyning ’n saak van aanranding met die doel om ernstig te beseer by die polisie aanhangig gemaak.“Die beweerde aanranding het op Saterdag 27 Julie tussen 20:00 en 23:00 by ’n huis in Opaalstraat in die informele nedersetting Tutaleni plaasgevind."Die saak is tot 22 Augustus uitgestel vir verdere ondersoek.BETOGINGDie verdagtes staan tereg op aanklagte van aanranding met die doel om ernstig te beseer en het in die landdroshof op Walvisbaai verskyn waar vriende en familie van Sheehama Vrydag ’n vreedsame betoging gehou en verklaar het dat hulle moeg is om onveilig te voel in die strate van Steenbras, Topaz en Opaal waar die beweerde aanranding plaasgevind het.Nujoma Martinus, wat namens Kuisebmond se gemeenskapslede gepraat het, het gesê hulle is moeg vir die misdaad in dié gebiede.“Ons wil ons broer, ons neef, ons seun vind. Ons wil nie hê hierdie saak moet herhaal word soos Shannon hier in Walvisbaai nie.“Hierdie bende [. . .] is die laaste persone wat hom gesien het en weet waar hy hom bevind. Jessica [sy meisie], sy moet net die waarheid vertel. Hulle moet net deel waar hy is.”Hope Neibes, ’n inwoner van Kuisebmond, het gesê dat dit baie gevaarlik in die gebied is.“Dit is die laaste strooi—ons hoor steeds van messteek en aanrandings, ons betoog, maar niks word gedoen nie. Die polisie moet ons help.”Sy het gepleit vir enigiemand wat weet waar Sheehama is om iets te sê. “As daar net ’n lyk is, sê asseblief net vir ons waar hy is.”Enigiemand met inligting oor waar hy hom bevind word versoek om adj.komm. Erastus Iikuyu by 081 246 4757 te kontak of adjudant Dennis Skrywer by 081 443 3377, die Kuisebmond-polisiekantoor by 064 219 070 of enige polisiekantoor in die omgewing.– republikein@republikein.com.na

Vyf in aanhouding ná man spoorloos verdwyn

Kommentaar

Republikein 2026-03-20

Meld asseblief aan om kommentaar te lewer

Vyf in aanhouding ná man spoorloos verdwyn

Kommentaar

Republikein 2026-03-20

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.