Vrou van polisieman borg geweier

Die vrou van ’n vermoorde polisiebeampte is in hegtenis geneem en aangekla in verband met sy wrede dood. Anelda Shigwedha het Maandag in die landdroshof op Grootfontein verskyn ná haar inhegtenisneming op Donderdag 9 April. Sy staar ’n aanklag van moord in die gesig, saam gelees met die wet op die bekamping van gesinsgeweld, in verband met die dood van haar man. Sersant Thomas Shigwedha, wat by die Okakarara-polisiestasie gestasioneer was, is in Junie verlede jaar dood aangetref in bosse naby Dr. Nicky Iyambostraat op Grootfontein. Hy het twee steekwonde aan die agterkant van sy kop gehad en sy gesig is met ’n klip vergruis. Ná die ontdekking het die verdagte van die toneel gevlug. Vroeër vanjaar in Februarie het die polisie kringtelevisie-beeldmateriaal vrygestel wat die oorledene in die geselskap van ’n onbekende vrou wys. Ondersoeke het uiteindelik daartoe gelei dat die polisie sy vrou in hegtenis geneem het. Volgens ’n hofbevel is die ondersoeke steeds aan die gang. Die staat het aangedui dat verdere bewyse benodig word, insluitend verklarings van getuies, MTC-data, laboratoriumuitslae en die toepassing van Artikel 26 van die Wet op die Voorkoming van Georganiseerde Misdaad (Poca). Tydens haar eerste hofverskyning voor landdros Adelinu Hailongo, het die weduwee die hof meegedeel dat sy private regsverteenwoordiging deur prokureur Raphael Liswaniso verkry het. Staatsaanklaer Kristiana Erastus het borgtog sterk teengestaan en verwys na die erns van die misdaad, dat die staat ’n sterk saak het en bekommerd is dat die beskuldigde met getuies wat sy ken, kan inmeng of ’n vlugrisiko is. Die aanklaer het verder aangevoer dat openbare belang en vertroue in regspleging ondermyn sou word indien borgotg in hierdie vroeë stadium aan die beskuldigde toegestaan word. Die hof het ook kennis geneem van die beduidende openbare aandag oor die saak met lede van die samelewing wat die hofverrigtinge noukeurig volg. Toe sy genader is om te reageer, het Shigwedha ’n opvallende erkenning gemaak en gesê dat sy in hierdie stadium nie borgtog toegestaan kan word nie weens kommer oor haar eie veiligheid. Nadat die beskuldigde ingelig is oor haar regte om amptelik vir borgtog aansoek te doen, het sy aangedui dat sy van plan is om op ’n later stadium met ’n borgtogaansoek voort te gaan. Die saak is tot 1 Junie 2026 vir verdere ondersoek uitgestel. Die beskuldigde bly in aanhouding.– aurelia@nmh-hub.com.na

Vrou van polisieman borg geweier

Kommentaar

Republikein 2026-07-17

Meld asseblief aan om kommentaar te lewer

Vrou van polisieman borg geweier

Kommentaar

Republikein 2026-07-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.