Vertroue in Namibië se regbank taan

Ellanie Smit – Namibiërs se vertroue in die regbank het die afgelope paar jaar aansienlik afgeneem, wat ‘n ernstige legitimiteitskrisis tot gevolg kan hê tensy iets drasties gedoen word.Die publiek se persepsie dat regters en landdroste by korrupsie betrokke is, het met 23% toegeneem – van 53% in 2012 tot 76% in 2019.Intussen glo 21% van regspraktisyns in Namibië dat regters by korrupsie betrokke is. Hierdie statistieke is vervat in ‘n verslag getiteld “Trust in the Judiciary and Perceived Strength of the Rule of Law” deur ISG Risk Services, wat in samewerking met Survey Warehouse saamgestel is.AFWAARTSE NEIGINGDie statistiek is gebaseer op data op openbare vertroue in Namibië se howe tussen 2009 en 2019 wat deur die Afrobarometer-opname ingesamel is, en ‘n afsonderlike opname wat in 2021 onder Namibiese regspraktisyns gedoen is.“Die aantal Namibiërs wat die howe vertrou, het die afgelope agt jaar aansienlik afgeneem, en gegewe hierdie neiging is dit waarskynlik dat, tensy iets drasties gedoen word, hierdie afwaartse neiging kan voortduur en moontlik tot ‘n ernstige legitimiteitskrisis in die regstelsel kan lei,” lui die verslag.Die Afrobarometer-data dui daarop dat vertroue in die howe in 2019 op sy laagste punt in 13 jaar was, met 40% van Namibiërs wat gesê het hulle vertrou nie die howe nie.Dit in vergelyking met 2006, toe 29% van Namibiërs nie die howe vertrou het nie.Intussen glo 65% van regspraktisyns dat korrupsie in die regbank onveranderd gebly het.“Dit is egter veelseggend dat aansienlik meer regspraktisyns van mening is dat korrupsie in die regbank aan die toeneem is (25%), pleks daarvan om af te neem (10%),” lui die verslag.INTEGRITEITOp die vraag oor hoeveel regters moontlik by korrupsie betrokke is, het die meeste regsverteenwoordigers (55%) gevoel hulle het nie genoeg om iets oor hulle te sê nie. Die opname het verder bevind dat 17% van regspraktisyns meen hoërhofuitsprake is nie regtens grondig nie, terwyl wydverspreide skeptisisme bestaan oor regters wat uitsluitlik op meriete aangestel word.Altesame 64% van regspraktisyns glo regters word nié op meriete nie, maar om ander redes soos persoonlike oortuigings of politieke motivering aangestel.OPVATTINGS‘n Oorweldigende 62% van die respondente glo die regter wat aangewys word om ‘n saak te bereg, kan die uitkoms daarvan beïnvloed.Slegs 17% meen regters van die hooggeregshof is ewe onpartydig in die beregting van ‘n saak. “Dit dui op ‘n aansienlike vlak van wantroue in sommige hoërhofregters,” lui die verslag. Daarbenewens het 37% van regspraktisyns saamgestem dat regters deur hul lojaliteit aan die regering beïnvloed word en 32% het gevoel regters word deur lojaliteit aan die huidige regerende party beïnvloed.Bietjie meer as een uit elke vyf (22%) van die respondente meen die moontlikheid van vergelding of wraakdade sal waarskynlik regters van die hoërhof beïnvloed waar die onsuksesvolle litigant die regering is, terwyl 52% meen dit is onwaarskynlik. – republikein@republikein.com.na

Vertroue in Namibië se regbank taan

Kommentaar

Republikein 2025-08-04

Meld asseblief aan om kommentaar te lewer

Vertroue in Namibië se regbank taan

Kommentaar

Republikein 2025-08-04

Meld asseblief aan om kommentaar te lewer

MELD AAN

Advertensie