Vermeende baba-moordenaar terug in hof

Die vrou wat na bewering haar ses maande oue seun vermoor het en ’n lasbrief vir haar inhegtenisneming verlede week uitgereik is aangesien sy versuim het om in die hof te verskyn, was toe al die tyd in aanhouding.

Me. Pricilla Stuurman (29) se prokureur, mnr. Milton Engelbrecht, was verlede week onbewus waar sy haar bevind het nie en die hof het derhalwe die lasbrief uitgereik.

Stuurman het gister aan die hof verduidelik dat sy op Rehoboth in aanhouding was en die verkeerde hofdatum is aan haar gekommunikeer. Sy is daarom nie na Windhoek vervoer om die hofverrigtinge by te woon nie.

Regter Claudia Claasen het Stuurman se verduideliking aanvaar en die lasbrief is teruggetrek.

Hoewel borgtog aan Stuurman toegestaan is, het sy nie die bedrag van N$1 000 betaal nie en is sy tans glo ook in aanhouding vir ’n ander hangende saak op Keetmanshoop.

Die verhoor se bewyse is reeds afgehandel en die hof was gereed om die verteenwoordigers se finale betoë aan te hoor toe hulle besef het dat die rekord nie volledig is nie.

“’n Gedeelte van die verrigtinge is weens 'n probleem met die toerusting nie getranskribeer nie. Gelukkig het ons [regter en prokureurs] aantekeninge gemaak en dit word tans gebruik om die rekord weer saam te stel,” het Claasen verduidelik.

Die saak is gister tot Dinsdag uitgestel sodat Claasen en die verteenwoordigers – in Stuurman se teenwoordigheid – die hersaamgestelde gedeelte kan in lees en die rekord dit weerspieël.

Eers hierna sal die finale betoë kan plaasvind en daarna sal die hof uitspraak lewer.

AGTERGROND

Stuurman beweer sy het per ongeluk haar ses maande oue baba, Stiaan Cidio Stuurman, laat val terwyl sy dronk was.

Die staat voer aan sy het haar baba se kop verskeie kere teen die vloer geslaan.

Die dokter wat die nadoodse ondersoek uitgevoer het, het tydens die verhoor getuig dat een val nie die baba se drie skedelbreuke kan verklaar nie.

– [email protected]