Van Wyk sê glo nee vir pleitooreenkoms
Borgtogaansoek hervat op 11 April
Sedert November 2021 voer die staat glo gesprekke met Nigel van Wyk oor 'n pleitooreenkoms waarin die staat na bewering wil hê hy moet skuldig pleit op een van die klagte waarop hy teregstaan.
Dit het Vrydag tydens die Fishrot-beskuldigde, Nigel van Wyk, se aansoek om borgtog aan die lig gekom dat die staat na bewering ’n pleitooreenkoms met hom wou aangaan.
Volgens Van Wyk se getuienis en ondersteunende dokumente wat by die hof ingedien is, het die staat aangebied om die ander klagte teen hom te laat vaar indien hy skuldig pleit op een van die klagte waarop hy teregstaan. Die klag waarop hy na bewering moes skuldig pleit is regsverydeling wat verband hou met Van Wyk se inhegtenisname toe hy by medebeskuldigde en sy destydse werkgewer, Sacky Shanghala, se huis vasgetrek is nadat na bewering probeer het om inkriminerende dokumente uit die huis te verwyder.
Die staat het glo aan Van Wyk gesê hy moes in sy pleitverduidelik sê dat Shanghala opdrag aan hom gegee het om die dokumente te verwyder.
Die staat het na bewering verder gesê indien Van Wyk skuldig pleit op die een klag, sal die staat nie sy regsverteenwoordiger se versoek dat hy net ’n boete betaal, teenstaan nie. Hy sou daarom vrygelaat word aangesien hy reeds ’n lang tydperk in aanhouding was.
Van Wyk het glo die aanbod van die hand gewys en gesê hy gaan nie skuldig pleit op iets wat hy nie gedoen het nie.
Gesprekke oor ’n pleitooreenkoms tussen Van Wyk en die staat het na bewering reeds in November 2021 begin.
FISHROT-GELD
Die staat beweer dat Van Wyk sowat N$1,9 miljoen uit die Fishrot-korrupsieskandaal gebaat het.
Hy voer egter aan dat hy buiten vir sy maandelikse salaris nie persoonlik baat gevind het by die geld wat hy ontvang het nie.
Van Wyk het tydens Donderdag se verrigtinge erken dat hy betalings van medebeskuldigde, James Hatuikulipi, asook ander entiteite van sy medebskuldigdes ontvang het, maar beweer dat hy die geld namens Ole Investment ontvang het en dit gebruik het vir die maatskappy se uitgawes. Dit was glo deel van sy pligte as werknemer van Ole Investments.
Van Wyk en sy regsverteenwoordiger, Mbanga Siyomuinji, voer aan dat Van Wyk rekenskap kan gee vir al die geld wat hy vanaf November 2017 tot November 2019 ontvang het.
Hy het glo sowat N$230 000 van Hatuikulipi ontvang; N$582 000 van ander entiteite; N$714 000 in salarisse; en ’n verdere bedrag van byna N$514 000 om die maatskappy se uitgawes te dek. Die totaal beloop sowat N$2 miljoen.
REGSVERYDELING
Van Wyk het ook verlede week getuig dat hy nie besig was om inkriminerende dokumente uit Shanghala se huis te verwyder toe hy in hegtenis geneem is nie.
Hy het getuig dat hy in Desember 2019 vir Shanghala by die Seeis-polisiekantoor, waar hy in aanhouding was, besoek het. Van Wyk het daarna na Shanghala se huis gegaan om glo ’n brief wat Shanghala aan hom gegee het, aan Shanghala se meisie te gee.
Nadat hy die brief oorhandig het, het hy na bewering na Shanghala se studeerkamer gegaan en twee sakke, ’n rekenaarskerm en -boks en paar dokumente gevat en in sy voertuig gelaai. Van Wyk is daarna in hegtenis geneem.
Volgens Van Wyk was hy van plan om die items na die kantoor te neem wat hy vir Shanghala moes inrig.
BORGTOGVOORWAARDES
Van Wyk het aan regter David Munsu gesê hy is bereid om enige borgtogvoorwaardes na te kom en is selfs bereid om drie keer per dag by ’n polisiekantoor aan te meld. Hy is ook bereid om N$10 000 vir borgtog te betaal.
Hy het die hof gesmeek om hom met sy vrou en kinders te herenig.
Van Wyk het Vrydag sy getuienis afgehandel en die saak is tot 11 April uitgestel. Die staat sal dan met kruisondervraging begin. Die verrigtinge is geskeduleer om tot 14 April te duur.
– [email protected]
Volgens Van Wyk se getuienis en ondersteunende dokumente wat by die hof ingedien is, het die staat aangebied om die ander klagte teen hom te laat vaar indien hy skuldig pleit op een van die klagte waarop hy teregstaan. Die klag waarop hy na bewering moes skuldig pleit is regsverydeling wat verband hou met Van Wyk se inhegtenisname toe hy by medebeskuldigde en sy destydse werkgewer, Sacky Shanghala, se huis vasgetrek is nadat na bewering probeer het om inkriminerende dokumente uit die huis te verwyder.
Die staat het glo aan Van Wyk gesê hy moes in sy pleitverduidelik sê dat Shanghala opdrag aan hom gegee het om die dokumente te verwyder.
Die staat het na bewering verder gesê indien Van Wyk skuldig pleit op die een klag, sal die staat nie sy regsverteenwoordiger se versoek dat hy net ’n boete betaal, teenstaan nie. Hy sou daarom vrygelaat word aangesien hy reeds ’n lang tydperk in aanhouding was.
Van Wyk het glo die aanbod van die hand gewys en gesê hy gaan nie skuldig pleit op iets wat hy nie gedoen het nie.
Gesprekke oor ’n pleitooreenkoms tussen Van Wyk en die staat het na bewering reeds in November 2021 begin.
FISHROT-GELD
Die staat beweer dat Van Wyk sowat N$1,9 miljoen uit die Fishrot-korrupsieskandaal gebaat het.
Hy voer egter aan dat hy buiten vir sy maandelikse salaris nie persoonlik baat gevind het by die geld wat hy ontvang het nie.
Van Wyk het tydens Donderdag se verrigtinge erken dat hy betalings van medebeskuldigde, James Hatuikulipi, asook ander entiteite van sy medebskuldigdes ontvang het, maar beweer dat hy die geld namens Ole Investment ontvang het en dit gebruik het vir die maatskappy se uitgawes. Dit was glo deel van sy pligte as werknemer van Ole Investments.
Van Wyk en sy regsverteenwoordiger, Mbanga Siyomuinji, voer aan dat Van Wyk rekenskap kan gee vir al die geld wat hy vanaf November 2017 tot November 2019 ontvang het.
Hy het glo sowat N$230 000 van Hatuikulipi ontvang; N$582 000 van ander entiteite; N$714 000 in salarisse; en ’n verdere bedrag van byna N$514 000 om die maatskappy se uitgawes te dek. Die totaal beloop sowat N$2 miljoen.
REGSVERYDELING
Van Wyk het ook verlede week getuig dat hy nie besig was om inkriminerende dokumente uit Shanghala se huis te verwyder toe hy in hegtenis geneem is nie.
Hy het getuig dat hy in Desember 2019 vir Shanghala by die Seeis-polisiekantoor, waar hy in aanhouding was, besoek het. Van Wyk het daarna na Shanghala se huis gegaan om glo ’n brief wat Shanghala aan hom gegee het, aan Shanghala se meisie te gee.
Nadat hy die brief oorhandig het, het hy na bewering na Shanghala se studeerkamer gegaan en twee sakke, ’n rekenaarskerm en -boks en paar dokumente gevat en in sy voertuig gelaai. Van Wyk is daarna in hegtenis geneem.
Volgens Van Wyk was hy van plan om die items na die kantoor te neem wat hy vir Shanghala moes inrig.
BORGTOGVOORWAARDES
Van Wyk het aan regter David Munsu gesê hy is bereid om enige borgtogvoorwaardes na te kom en is selfs bereid om drie keer per dag by ’n polisiekantoor aan te meld. Hy is ook bereid om N$10 000 vir borgtog te betaal.
Hy het die hof gesmeek om hom met sy vrou en kinders te herenig.
Van Wyk het Vrydag sy getuienis afgehandel en die saak is tot 11 April uitgestel. Die staat sal dan met kruisondervraging begin. Die verrigtinge is geskeduleer om tot 14 April te duur.
– [email protected]
Kommentaar
Republikein
Geen kommentaar is op hierdie artikel gelaat nie