Twis oor Baster-kapteinskap mik hof toe
Britz se prokureur onttrek
Mnr. Rynault van Wyk vra dat die verkiesing van April 2021 tersyde gestel word.
Die Baster-kapteinsverkiesing wat verlede jaar plaasgevind het en mnr. Jacky Britz gevolglik as die nuwe kaptein verkies is, sou môre (11 Maart) vir die eerste keer in die hoërhof in Windhoek betwis word.
Mnr. Rynault van Wyk, medekandidaat tydens die verkiesing, dagvaar Britz saam met mnre. Cyril Pienaar en Wesley Harcher, en die verkiesingskomitee van die kapteinskap van die Rehoboth Baster-gemeenskap, om die verkiesing van 24 April 2021 nie vry nie, onreëlmatig en onregverdig te verklaar en tersyde te stel.
Mnr. Hafeni Hamuyela, wat vir Britz, die destydse waarnemende kaptein, Harcker, die voorsitter van die komitee, en die komitee verteenwoordig het, het homself Dinsdag aan die saak onttrek.
Hulle moet kennis gee van nuwe regsverteenwoordiging en ook verklarings indien.
Herhaalde pogings om vrae aan Britz beantwoord te kry, of selfs kommentaar te kry, was onsuksesvol.
“Die saak is goed ondersteun met klinklare bewyse van beweerde en omvangryke ongerymdhede wat die verkiesing nie vry, regverdig en geloofwaardig maak nie,” skryf van Wyk in ’n verklaring oor die geskil.
Ook in die hofstukke brei hy uit oor pogings om die Rehoboth Ekumeniese Raad, die Hardap-goeweneur en die adjunkminister van stedelike en landelike ontwikkeling te betrek, sonder dat enige oplossing gevind kon word.
“Ons het ook verder pogings aangewend om huishoudelike sake binne die gemeenskap en die Hardapstreek uit te sorteer deur gesagsfigure by die huis te nader,” skryf hy.
Nog voor April se verkiesing het van Wyk beswaar gemaak oor die kort voorbereidingsperiode.
In sy verklaring sê hy: “’n Haastig saamgestelde groep mense het oornag ’n verkiesingskomitee geword en het die verkiesingsproses oor net ses weke – vanaf die tweede vergadering waar kandidate genomineer is – gejaag.”
Voorvalle van stembedrog, onreëlmatige aanlyn stemmery, onverduidelike verwydering van stembussies, en 66 stemme wat verdwyn het en weer in ’n koevert verskyn het, is deur sy bewyse aangedui.
“Ter wille van ons volk is dit ons mening dat die hooggeregshof nou die enigste pad vorentoe is,” volgens van Wyk.
Inligting wat tydens die verkiesing gedeel is, dui dat sowat 9 000 Basters geregistreer het, maar net 3 100 het gestem.
Die verkiesing is aanvanklik op 1 Maart 2021 deur die Kantoor van die Kaptein aangekondig, met ’n beroep vir betrokkenheid by nominasies vir kandidate op 22 Maart. Die voormalige kaptein John McNab is in 2020 oorlede.
“In terme van die voorvaderlike wette moet ’n verkiesing onmiddellik gehou word nadat ’n kaptein sterf. Na die heengang van kaptein McNab het ons reeds met die proses begin. Die skielike afsterwe van mnr. B. Buys het ons beplanning ontwrig. Ek het die datum vir die verkiesing by die komitee ingedien en hulle werk onder my gesag. Die verkiesingsdatum bly 24 April 2021,” het Pienaar in ’n kennisgewing op 24 Maart 2021 geskryf. – [email protected]
Mnr. Rynault van Wyk, medekandidaat tydens die verkiesing, dagvaar Britz saam met mnre. Cyril Pienaar en Wesley Harcher, en die verkiesingskomitee van die kapteinskap van die Rehoboth Baster-gemeenskap, om die verkiesing van 24 April 2021 nie vry nie, onreëlmatig en onregverdig te verklaar en tersyde te stel.
Mnr. Hafeni Hamuyela, wat vir Britz, die destydse waarnemende kaptein, Harcker, die voorsitter van die komitee, en die komitee verteenwoordig het, het homself Dinsdag aan die saak onttrek.
Hulle moet kennis gee van nuwe regsverteenwoordiging en ook verklarings indien.
Herhaalde pogings om vrae aan Britz beantwoord te kry, of selfs kommentaar te kry, was onsuksesvol.
“Die saak is goed ondersteun met klinklare bewyse van beweerde en omvangryke ongerymdhede wat die verkiesing nie vry, regverdig en geloofwaardig maak nie,” skryf van Wyk in ’n verklaring oor die geskil.
Ook in die hofstukke brei hy uit oor pogings om die Rehoboth Ekumeniese Raad, die Hardap-goeweneur en die adjunkminister van stedelike en landelike ontwikkeling te betrek, sonder dat enige oplossing gevind kon word.
“Ons het ook verder pogings aangewend om huishoudelike sake binne die gemeenskap en die Hardapstreek uit te sorteer deur gesagsfigure by die huis te nader,” skryf hy.
Nog voor April se verkiesing het van Wyk beswaar gemaak oor die kort voorbereidingsperiode.
In sy verklaring sê hy: “’n Haastig saamgestelde groep mense het oornag ’n verkiesingskomitee geword en het die verkiesingsproses oor net ses weke – vanaf die tweede vergadering waar kandidate genomineer is – gejaag.”
Voorvalle van stembedrog, onreëlmatige aanlyn stemmery, onverduidelike verwydering van stembussies, en 66 stemme wat verdwyn het en weer in ’n koevert verskyn het, is deur sy bewyse aangedui.
“Ter wille van ons volk is dit ons mening dat die hooggeregshof nou die enigste pad vorentoe is,” volgens van Wyk.
Inligting wat tydens die verkiesing gedeel is, dui dat sowat 9 000 Basters geregistreer het, maar net 3 100 het gestem.
Die verkiesing is aanvanklik op 1 Maart 2021 deur die Kantoor van die Kaptein aangekondig, met ’n beroep vir betrokkenheid by nominasies vir kandidate op 22 Maart. Die voormalige kaptein John McNab is in 2020 oorlede.
“In terme van die voorvaderlike wette moet ’n verkiesing onmiddellik gehou word nadat ’n kaptein sterf. Na die heengang van kaptein McNab het ons reeds met die proses begin. Die skielike afsterwe van mnr. B. Buys het ons beplanning ontwrig. Ek het die datum vir die verkiesing by die komitee ingedien en hulle werk onder my gesag. Die verkiesingsdatum bly 24 April 2021,” het Pienaar in ’n kennisgewing op 24 Maart 2021 geskryf. – [email protected]
Kommentaar
Republikein
Geen kommentaar is op hierdie artikel gelaat nie