Twee skuldig bevind aan Riedel-moorde

Bernadus Afrikaner (links) en Salaphual Unaeb is gister in die hoërhof in Windhoek deur regter Naomi Shivute skuldig bevind aan die wrede moorde op die 68-jarige Armin en Brunhild Riedel (66). Die moorde het op 20 Januarie 2018 op die plaas Grünfeld in die Gobabis-distrik plaasgevind. Die slagoffers se liggame is onherkenbaar verbrand gevind nadat die beskuldigdes die plaashuis aan die brand gesteek het in ’n berekende poging om bewysstukke te vernietig en die moorde toe te smeer. Shivute het beide mans op ’n aanklag van verkragting vrygespreek en bevind dat die staat nie voldoende bewyse gelewer het nie. Die aanklagte waaraan hulle skuldig bevind is, sluit in moord, roof, brandstigting en die onwettige besit van ’n vuurwapen. Die saak is tot 17 Junie vir voorvonnisverrigtinge uitgestel. Foto Rita Kakelo