Stel UPM-lede weer aan, beveel regter

Die hoërhof in Windhoek het verlede week ’n hofbevel uitgereik wat die president van die United People’s Movement (UPM), Jan van Wyk, se besluit om drie voormalige partylede af te dank, tersyde gestel het.Regter Shafimana Ueitele het gelas dat die voormalige UPM-lede Celeste Becker, Melvin van Wyk en Moretha van Wyk – wat in Februarie en Maart 2023 van hul pligte onthef is – heraangestel moet word.“Die verweerders [Jan van Wyk en die besturende komitee van die UPM] moet, met onmiddellike effek, elke eiser heraanstel in die posisie wat hy of sy verkies is tydens die vergadering van die verkiesende sentrale komitee wat op 14 Mei 2022 gehou is,” lui die hofbevel.Voor sy afdanking was Melvin van Wyk as die UPM se nasionale tesourier aangestel, Becker was die sekretaris-generaal en Moretha van Wyk was die nasionale voorsitter van die party.Ueitele het bevind dat Jan van Wyk se besluit onwettig was en dus geen gewig dra nie.Hy het ook beveel dat Jan van Wyk en die uitvoerende komitee van die UPM die koste van die regsgeding moet betaal. Die saak is op 30 Julie afgehandel en van die rol geskrap.AFDANKINGBecker, Melvin van Wyk en Moretha van Wyk het reeds in Maart 2023 die saak by die hoërhof in Windhoek aanhangig gemaak nadat hulle afgedank is.Volgens ’n verklaring wat die UPM destyds uitgereik het, is Becker afgedank omdat sy na bewering die party in ’n “onsekere finansiële posisie” geplaas het.Die UPM het gesê terwyl die party ’n verkiesingsbegroting van N$150 000 gehad het, het die party sowat N$293 000 bestee en dat Becker se ligsinnige besteding toegestaan is sonder die goedkeuring van die UPM se bestuur. Becker het ook aangevoer dat Jan van Wyk “ongrondwetlike en onwettige” briewe aan hulle gestuur het waarin hy beweer het dat hulle uit hul verkose posisies in die UPM afgedank is.Sy het aangevoer dat hy en die bestuurskomitee geen mandaat gehad het om sulke aksies uit te voer nie, maar dat slegs die sentrale komitee gemagtig is om dit te doen ingevolge die party se grondwet.Hoewel die hofbevel reeds op 30 Julie uitgereik is, is die redes vir die beslissing teen gistermiddag nog nie op die hof se aanlyn stelsel (e-justice) gelaai nie.– kristien@nmh-hub.com.na

Stel UPM-lede weer aan, beveel regter

Kommentaar

Republikein 2025-12-18

Meld asseblief aan om kommentaar te lewer

Stel UPM-lede weer aan, beveel regter

Kommentaar

Republikein 2025-12-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.