Staatsaanklaer van saakdossiere beroof

’n Staatsaanklaer van Rundu is Saterdag van amptelike saakdossiere beroof toe hy by ’n winkel in ’n beweerde lokval gelei is. Volgens Bonifatius Kanyetu, die koördineerder vir misdaadondersoeke van die Namibiese polisie (Nampol) in die Kavango-Oosstreek, het die verdagtes toegeslaan toe die aanklaer van die Rundu-landdroshof af gekom het, op pad huis toe was en by ’n winkel aangegaan het.“Hulle het hom bestorm toe hy uit sy motor klim,” het Kanyetu gesê.Hy het bygevoeg dat die diewe met ’n skootrekenaar, elektroniese toebehore en sensitiewe saakdossiere weggekom het. Die verdagtes het die dossiere tydens hul vlugtog in nabygeleë bosse gegooi en die polisie het dit vinnig teruggevind. ’n Kampstoel wat aan die aanklaer behoort, is ook by een van die verdagtes teruggevind wat Dinsdag in hegtenis geneem is. Tot dusver is een verdagte in hegtenis geneem, terwyl drie ander steeds op vrye voet is. Kanyetu het gesê die polisie is aktief besig om die ander verdagtes, wat aan hulle bekend is, op te spoor. Die polisie glo die verdagtes het hoofsaaklik in die elektroniese toestelle belang gestel, aangesien die saakdossiere tydens hul vlugtog weggegooi is.Dié voorval kom in ’n gespanne tyd vir Namibië se regbank ná die wrede dood van die beheeraanklaer van Ondangwa, Justine Shiweda, en dreigemente teen ’n aanklaer in Grootfontein. Verlede jaar is die Rundu-landdroshof aan die brand gesteek, wat noodsaaklike saakdokumente vernietig het.Ten spyte van hierdie kommerwekkende voorvalle, het Kanyetu beklemtoon dat die rooftog eerder na ’n toevallige voorval lyk as na ’n doelgerigte aanval op die regbank.“Die veiligheid van regspersoneel is ’n prioriteit en ons werk onvermoeid om te verseker dat alle verdagtes voor die gereg gebring word,” het hy gesê.Ná die voorval het die aanklaer-generaal, Martha Imalwa, aan Network Media Hub (NMH) beklemtoon dat dit nie die beleid van die kantoor van die aanklaer-generaal is dat aanklaers saakdossiere huis toe neem nie. “Ons het ’n beleid in plek wat aanklaers inlig om nie dossiere huis toe te neem nie,” het Imalwa gesê.Sy het bevestig aanklaers word nie toegelaat om saakdossiere uit die kantoor te verwyder nie. “Dit is die standpunt van die kantoor.”Imalwa het ook verduidelik indien ’n dossier wegraak, die saak by die polisie aangemeld moet word. “As ’n aanklaer ’n dossier verloor, hetsy in die kantoor of elders, moet dit by die polisie aangemeld word en ’n strafsaak word geopen. Die polisie sal dan die omstandighede ondersoek waaronder so ’n dossier of dossiere weggeraak het,” het sy gesê. Oor Saterdag se voorval het Imalwa gesê die saak word steeds ondersoek. “Ek het die verslag ontvang, maar dit word ondersoek om vas te stel onder watter omstandighede die sogenaamde rooftog plaasgevind het,” het sy gesê.’n Bron het aan NMH gesê dit het algemeen geword dat aanklaers dossiere huis toe neem om behoorlik vir die hof voor te berei. “Ons neem soms dossiere huis toe om voor te berei. In die geval dat ’n dossier wegraak, het ons prosedures in plek waarvolgens die Namibiese polisie digitale kopieë van die dossier maak wat op ’n databasis gestoor word voordat dit voor die hof gebring word.“Dus beteken die verlies van die fisiese dokumente nie heeltemal die einde van ’n saak nie,” het die bron gesê.– eliot@nmh-hub.com.na

Staatsaanklaer van saakdossiere beroof

Kommentaar

Republikein 2026-08-03

Meld asseblief aan om kommentaar te lewer

Staatsaanklaer van saakdossiere beroof

Kommentaar

Republikein 2026-08-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.