Staat verwar 'sagtewarestelsel met ondergrondse tenks'

Die Namcor-Enercon-beskuldigde Peter Elindi het die staat se bewerings weerlê dat die multimiljoendollar-transaksie wat sentraal staan in die Teenkorrupsiekommissie (ACC) se korrupsiesaak ‘n kriminele skema was, en gesê dit was ‘n wettige kommersiële transaksie. Elindi, ‘n direkteur van Enercon, en die verdedigingsadvokaat Sisa Namandja het die staat se sentrale fokus van bedrog aan stukke getrek en aangevoer Elindi word gekriminaliseer vir die uitvoer van ‘n wettige kommersiële transaksie deur die verkoop van regte oor bates wat Enercon wettiglik besit en gebou het.Namandja het gister tydens die borgtogaansoek voor landdros Linus Samunzala in die landdroshof in Windhoek gesê die staat se saak is op ‘n “fundamentele misverstand” gebou wat twee onverwante projekte saamvoeg en nie onderskei tussen brandstofbestuurtegnologie en die eienaarskap van brandstofinstruktuur nie. “Hulle het ‘n sagtewarestelsel met ondergrondse tenks verwar. Dit is verstommend, my kliënt word daarvan beskuldig dat hy Namcor bedrieg het deur te verkoop wat sy maatskappy wettig besit en van die grond af opgebou het,” het Namandje gesê.Tydens sy hoofgetuienis het Elindi bevestig dit wat aan Namcor verkoop is, was die reg om pompe en tenks by militêre basisse te gebruik wat deur Enercon, voorheen DPF, besit word. “Namcor het nie die tegniese stelsel gekoop nie. Hierdie is totaal aparte bates,” het Elindi getuig. Om die verwarring te verduidelik, het Namandje die hof deur omvattende dokumentasie gelei. Dit sluit in die oorspronklike ooreenkoms in 2012 met die ministerie van verdediging en veteranesake en ‘n 2023-addendum wat Enercon se verpligting uiteensit om met die gebruik van sy eie kapitaal en in lyn met die nodige vereistes ‘n hele nuwe infrastruktuur by verskeie weermagbasisse insluitend Rundu, Grootfontein en Oluno te bou.“Hierdie was nie die bates van die ministerie van verdediging nie. Enercon het dit gebou met die gebruik van private fondse. Die maatskappy was die reg verskuldig om sy N$58 miljoen-belegging deur 'n 15-jaar brandstofvoorsieningskontrak te verhaal,” het Namandje aangevoer.Die hof het gehoor hoe Enercon kontraktueel verplig was om omgewingsremediëring uit te voer, verouderde infrastruktuur af te breek en nuwe ondergrondse tenks en brandstofstelsels op verskeie terreine te installeer.Dié massiewe opgraderings wat deur Enercon en nie die staat gefinansier is nie, het die installering van 23 000-liter tenks per basis, pompe, ondergrondse verbindings en ‘n huis vir ‘n petroljoggie ingesluit. “Dit was ‘n kapitaal-intensiewe openbare-private vennootskap, nie ‘n bedrogspul nie,” het Namandje aangevoer. Elindi het getuig toe Namcor later belangstelling getoon het om hierdie installasies te bekom, is die verkoopprys van N$53 miljoen bereken op grond van wat nog oor die oorblywende nege jaar van Enercon se oorspronklike 15-jaar herstelperiode verhaal kon word.“Ons het nie eers ons volle koste verhaal nie. Ons het dit teen ‘n afslagbedrag verkoop,” het Elindi gesê.Namandje het Enercon, ‘n beskeie brandstofmaatskappy in besit van twee aandeelhouers met die staatsbeheerde Namcor vergelyk wat ‘n grootmaat brandstofverskaffer is. Volgens hom was dit Namcor wat die koopaanbod gemaak en die nodige sorgvuldigheid uitgevoer het. “Namcor het met sy eie ingenieurs die bates laat inspekteer en evalueer. Hulle het presies geweet wat hulle koop,” het hy gesê.Namandje het die aanklaers daarvan beskuldig dat dit die “kriminele proses misbruik om polisieman oor kommersiële kontrakte te speel” en die hof daarteen gewaarsku om toe te laat dat openbare druk wetlike standaarde te buig. “In die ergste geval, sou Namcor kopersberou het, kan hulle dagvaar. Maar om 'n man te arresteer omdat hy verkoop het wat hy gebou en wettiglik besit het, is nie net verkeerd nie, dit is gevaarlik,” het hy gesê. Hy het bygevoeg dat die staat se bewering dat die infrastruktuur deur die ministerie van verdediging “bewaar” is, weerlê word deur die einste ooreenkomste waarop dit nou staatmaak.Volgens Elindi het die eienaarskap en risiko vir die installasies by Enercon gebly, en Enercon het volle regte gehad om dit te gebruik, te bestuur en uiteindelik oor te dra. Namandje het beklemtoon dat enigiemand met "'n bietjie kennis van die reg en handel" sou verstaan dat Elindi nie persoonlik 'n party tot die transaksie was nie, en het beklemtoon dat niemand van Namcor, insluitend sy besturende direkteur, Imms Mulunga, Elindi ooit van bedrog beskuldig het of beweer het dat hulle mislei is nie.“Het hulle jou ooit van bedrog beskuldig? Het enigiemand gekla dat jy misleidende of bedrieglike inligting verskaf het? ‘Ek sou nie hierdie ooreenkoms onderteken het as ek hierdie inligting gehad het nie’?” het Namandje gevra, waarop Elindi geantwoord het: “Glad nie”. - republikein@republikein.com.na

Staat verwar 'sagtewarestelsel met ondergrondse tenks'

Kommentaar

Republikein 2026-01-28

Meld asseblief aan om kommentaar te lewer

Staat verwar 'sagtewarestelsel met ondergrondse tenks'

Kommentaar

Republikein 2026-01-28

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.