Staat appelleer teen sodomie-uitspraak

“Die hooggeregshof gaan hulle roskam soos die regering nog nooit gesien het nie. . . veral as hulle met daardie nonsens vorendag kom.” Só sê die Windhoekse prokureur Uno Katjipuka oor die regering se bewerings dat die verskil tussen sodomie en anale penetrasie tussen ’n man en vrou is dat “dit nie gesê kan word dat ’n man ’n ander man ‘per ongeluk’ of ‘onbewustelik’ seksueel penetreer nie”.Sy waarsku ook dat die regering se verweer dat seksualiteit nie ingevolge die Grondwet beskerm word nie, die deur kan oopmaak vir diskriminasie op grond van ander eienskappe wat nie uitdruklik in die Grondwet beskerm word nie.Dít nadat verskeie staatsliggame appèl in die hooggeregshof aangeteken het teen die hoërhof se uitspraak om die sodomiewet ongrondwetlik te verklaar. “Die bewering dat die homofobe wat ons Grondwet doelbewus opgestel het nie seksuele oriëntasie ingesluit het nie, verloor uit die oog dat die Grondwet bedoel is om ’n lewende dokument te wees om toekomstige geslagte te dien. “’n Hof se interpretasie van die Grondwet moet die hedendaagse samelewing dien,” het sy gesê .“Wat die homofobiese stigters en opstellers van die Grondwet bedoel het, is nie van belang nie, wat saak maak is wat die Grondwet sê en dit beskerm die reg op gelykheid en die onbetwisbaarheid van ’n mens se waardigheid,” verduidelik Katjipuka.Sy meen dat ’n persoonlike agenda in die regering se gronde vir appèl deurskemer. “Dit lyk vir my of die regering ’n neerbuigende en paternalistiese standpunt inneem wanneer hulle aanvoer dat dit as gevolg van biologiese, anatomiese en sosiale verskille tussen mans en vrouens oukei is om teen homoseksuele mans te diskrimineer. Dit is waar die regering en hul prokureurs na my mening hul persoonlike homofobie toon.”Partye wat as appellante aangeteken is, is die minister van justisie; die ministerie van binnelandse sake, immigrasie, veiligheid en sekuriteit; die minister van verdediging en veteranesake; die aanklaer-generaal; en die prokureur-generaal. Die respondent in die saak is die LGBTQIA -aktivis, Friedel Dausab, wat oorspronklik sy aansoek by die hoërhof aanhangig gemaak het om die wet wat sodomie kriminaliseer ongrondwetlik te laat verklaar. Die regering se kennisgewing van appèl voer aan dat die hoërhof te veel waarde aan openbare mening geheg het en dit met die sosiale norm verwar het.Die appellante beweer ook dat die hoërhof versuim het om op al hul gronde, soos bepaal deur ’n uitspraak in 2019, te reageer. Dié uitspraak het beslis dat ’n hof op alle gronde moet reageer om dit vir ’n appèlhof makliker te maak om ’n besluit te neem, selfs al maak die hof staat op slegs een eis in sy uitspraak.Katjipuka meen die regeringsentiteite se prokureurs moet hul eed in gedagte hou.– irene-mari@nmh-hub.com.na

Staat appelleer teen sodomie-uitspraak

Kommentaar

Republikein 2026-08-03

Meld asseblief aan om kommentaar te lewer

Staat appelleer teen sodomie-uitspraak

Kommentaar

Republikein 2026-08-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.