Spoedhobbels draai in hoërhof

Die gewraakte spoedhobbels wat op Windhoek se westelike verbypad geïnstalleer is om verkeer te vertraag en voetgangers te beskerm, het Vrydag in die hoofstad se hoërhof gaan draai. 

Die menseregte-aktivis Michael Amushelelo het ‘n dringende aansoek in die hoërhof gebring wat vra vir ‘n bevel wat owerhede dwing om die onlangs geïnstalleerde spoedhobbels op een van Windhoek se besigste roetes te verwyder.

Amushelelo beweer in hofstukke dat vier ongelukke reeds deur die gewraakte hobbels veroorsaak is. Hy verwys ook na ‘n ambulans wat op ‘n noodgeval gereageer het, wat deur die hobbels vertraag is om by sy bestemming te kom.  

Die spoedhobbels is weens groeiende kommer oor voetgangersterftes langs die besige roete opgerig, wat verskeie dele van die hoofstad verbind en daagliks duisende voertuie dra. Die uiteinde was egter opeenhoping van verkeer, skade aan voertuie en kommer oor veiligheid. 

Die minister van werke en vervoer Veikko Nekundi het Vrydag in reaksie op die dringende aansoek die spoedhobbels verdedig. Hy het na verskeie tegniese en wetlike besware verwys, insluitend of Amushelelo die regsbevoegdheid het om die saak aanhangig te maak en of die aansoek werklik dringend is.

Nekundi het ook die bewoording van die aansoek betwis en aangevoer dat die verwysings na “hoofweë” en “snelweë” wetlik gebrekkig is. Volgens die minister erken Namibiese wetgewing net hoofpaaie, distrikpaaie en plaaspaaie. 

Hoewel die wet toelaat dat ‘n hoofpad deur publikasie in die Staatskoerant as 'n snelweg verklaar kan word, sê Nekundi is geen sodanige snelweg in Namibië gepubliseer nie. Hy het ook Amushelelo se regsbevoegdheid en die dringendheid van die aansoek betwis en die hof versoek om die saak met koste van die hand te wys.

Amushelelo het Nekundi se argument vir die klassifisering van paaie as “semanties” afgemaak en gesê die fisiese aard en funksie van die pad bly onveranderd ongeag hoe dit in die wet geklassifiseer word. Uitspraak oor die dringende aansoek word op 30 Junie gelewer.

Elizabeth Kheibes berig intussen die Paaieowerheid (PA) het bewerings op sosiale media weerlê dat die spoedhobbels belastingbetalers N$12 miljoen gekos het. Volgens die RA het die werklike uitgawes tot op hede sowat N$704 000 beloop. Dit sluit die verkryging, padtekens en vervoer in Suid-Afrika in. 

Die spoedhobbels op dele van die B1 Westelike Ompad en die A1-pad agter Prosperita is volgens die RA as ‘n dringende ingryping ingestel, na ‘n toename in voetgangerverwante ongelukke, insluitend noodlottige gevalle.  

Die liggings is bepaal deur assessering van padveiligheid en ongeluksdata wat dit as hoërisikosones identifiseer het waar voetgangers gereeld die paaie met groot verkeersvolumes met relatief hoë oorsteek. 

Die RA sê die maatreëls is bedoel om voertuigspoed te verminder en bestuurdersbewustheid en voetgangerveiligheid te verbeter. 

Vroeër vandeesmaand het die RA, saam met die vervoerministerie en ander rolspelers begin om spoedhobbels tussen die Onafhanklikheidsrylaan-afrit naby die Katutura-hospitaal en die Lafrenz-afrit op die B1 westelike verbypad, sowel as die A1-pad tussen Prosperita en die Windhoek Buitekluboord te installeer. ‘n Aanlyn petisie stel voetgangerbrûe as ‘n veiliger en minder ontwrigtende alternatief voor. - [email protected]