Speurder skuldig aan korrupsie

’n Voormalige senior polisiespeurder op Walvisbaai is skuldig bevind aan omkopery, nadat hy probeer het om ’n staatsaanklaer met N$60 000 om te koop.Jafet Simon is Maandag deur landdros Vicky Nikolaidis in die Swakopmund-streekhof skuldig bevind aan die oortreding van ’n afdeling van die teenkorrupsiewet.Hy sal later in April gevonnis word. Simon het ook ’n aanklag van dwarsboming van die gereg in die gesig gestaar, maar is weens ’n swak saak aan die kant van die staat hierop vrygespreek.Simon se skuldigbevinding spruit uit ’n saak in 2018 waarin die Pakistanse burger Farhan Khatri saam met twee Namibiese vroue aangekla is van mensehandel en die verkragting van ’n minderjarige op Walvisbaai. Khatri en sy twee medebeskuldigdes is uiteindelik skuldig bevind en tot 20 jaar tronkstraf gevonnis.Simon en Khatri het egter glo tydens Khatri se verhoor “vriende” geword, ten spyte daarvan dat Simon die ondersoekbeampte in die saak was.Khatri wou na bewering hê dat Simon die aanklaer, Tresia Hafeni, moes beïnvloed om die saak sodanig te hanteer dat die aanklagte laat vaar kon word. Alternatiewelik moes Khatri se paspoort aan hom terugbesorg word sodat hy die land kon verlaat.Simon, wat in 2020 in hegtenis geneem is en tot 2024 in aanhouding was voordat hy borgtog toegestaan is, het al die bewerings teen hom ontken.Volgens hom was hy nie deel van enige korrupte bedoeling nie. Hy het ook aangevoer toe hy besef ’n misdaad word gepleeg, het hy dit op homself geneem om die betrokke persone – naamlik Khatri en Hafeni – vas te trek. Hierdie argument was egter volgens Nikolaidis kern tot die hof se verwerping van sy weergawe.Volgens die hof het Simon deur sy eie erkenning by die proses betrokke geraak: Hy het met Hafeni gekommunikeer; vergaderings tussen Hafeni en Khatri gereël en bygewoon; die geld hanteer en selfs die omkoopgeld “uitgebeeld” in wat hy beweer het ’n poging was om Hafeni op heterdaad te betrap. In plaas daarvan is hy self vasgetrek.STAATSAANKLAERTydens haar getuienis het Hafeni volgehou dat dit Simon was wat haar die eerste keer op 6 September 2020 genader het en haar versoek het om die saak te laat verdwyn en Khatri se paspoort terug te besorg. Dit is gevolg deur vergaderings by haar huis in Swakopmund. Sy het getuig dat sy dadelik haar bestuurders en ook die Teenkorrupsiekommissie van Namibië (ACC) in kennis gestel het. Dit het gelei tot die beplande lokval en operasie waarvan sy deel was. Volgens Hafeni het Khatri die helfte van die N$60 000 by haar huis aan haar oorhandig en waaroor sy ook dadelik die ACC in kennis gestel het. Amptenare het die geld by haar huis getel, afgeneem en as bewysstuk gekonfiskeer.Simon het erken hy was by die meeste van hierdie vergaderings teenwoordig. Hy het ook erken dat hy bewus geword het van Khatri en Hafeni se bedoelings, maar het ontken dat hy deel van enige omkopery was.Volgens Hafeni is ooreengekom dat die paspoort aan Simon oorhandig sou word in ruil vir die oorblywende N$30 000. ’n Datum en plek is onder leiding van die ACC tydens middagete by haar kantoor by die streekhof gereël. Ander getuies, insluitend ACC-amptenare en senior Erongo-polisiebeamptes, het Hafeni se weergawe bevestig. Hulle het ook bevestig dat die eerste paaiement in kontant by haar huis gevind is, behoorlik gedokumenteer en beveilig nadat sy dit aangemeld het.Wat Simon se bewering betref dat hy die saak onafhanklik ondersoek het, het ’n senior Erongo-polisieondersoeker getuig dat Simon niemand van sulke voornemens in kennis gestel het nie. Hy het verduidelik dat formele prosedures in sulke operasies gevolg moet word, wat Simon na bewering nie gedoen het nie.LOKVALOp die dag van die lokval het Simon die kontant gebring en die paspoort ontvang soos wat vooraf gereël is. In plaas daarvan om ’n arrestasie te maak, het hy Hafeni se kantoor verlaat en is hy deur die ACC in hegtenis geneem.Nikolaidis het die skerp kontras tussen Hafeni en Simon se reaksies op die situasie uitgelig. Volgens die landdros het Hafeni uitgebreide kruisondervraging weerstaan en konsekwent en geloofwaardig gebly.“Ek is nie oortuig dat haar getuienis gekritiseer kan word vir ’n gebrek aan geloofwaardigheid nie,” het Nikolaidis gesê en bygevoeg dat Hafeni die saak onmiddellik by haar toesighouers en die ACC aangemeld het. “Daar is dus geen rede om Hafeni se getuienis in twyfel te trek nie.”Nikolaidis het Simon se bewering bevraagteken dat hy sy eie ondersoek van stapel gestuur het.“Jy erken die meeste van die gebeure, maar ontken dat jy korrup opgetree het. Ek vind dat jou optrede, toe jy kennis dra van die korrupsie, heeltemal in teenstelling was met Hafeni se optrede,” het Nikolaidis gesê.Sy het daarop gewys dat Simon nie die saak aangemeld het nie, nie rekords gehou het nie, nie bewyse gedokumenteer het nie en geen formele ondersoekproses begin het nie.“Jy kon vir Hafeni gesê het dat jy nie aan korrupsie deelneem nie, maar in plaas daarvan het jy die geld oorhandig en die paspoort geneem voordat jy in hegtenis geneem is. “Jou optrede maak my versigtig vir jou storie en jou weergawe,” het sy afgesluit voordat sy Simon skuldig bevind het op die hoofaanklag van omkopery. Simon se borgtog is verleng tot die datum van sy vonnis.– adam@erongo.com.na

Speurder skuldig aan korrupsie

Kommentaar

Republikein 2026-05-26

Meld asseblief aan om kommentaar te lewer

Speurder skuldig aan korrupsie

Kommentaar

Republikein 2026-05-26

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.