'Slimdorp' by Avis dalk IPBF se dood

Die groot behuisingsontwikkeling in Avis waarop die Sakeforum vir Inheemse Mense (IPBF) sy toekomshoop geplaas het, is in gedrag en die forum staar likwidasie in die gesig. Hoërhofregter Shafimana Ueitele het verlede week uitstel gegee nadat die IPBF se uitvoerende hoof, Chrisch Siririka, die dag voor die verhoor op Dinsdag 6 Desember ‘n skriftelike versoek ingedien het waarin hy vir meer tyd gevra het. Volgens Siririka het die forum nie regsverteenwoordiging nie, aangesien hulle nie weer iemand aangestel het nadat die vorige prokureur bedank het nie. “Ons vorige regsverteenwoordiger het bedank en ons het geen rede gesien om verteenwoordiging te kry nie, aangesien die voormalige bevel uitgereik was en ons vol vertroue was dat ons voor 6 Desember ‘n skikkingsooreenkoms met (die konstruksiemaatskappy) China Harbour sou kon bereik,” lui Siririka se skriftelike versoek.Die projek sukkel al meer as sewe jaar om op dreef te kom, ondanks ondersteuning uit politieke oorde. Dié ondersteuning is getoon in gevalle soos die goewerneur van die Khomasstreek, Laura Mcleod-Katjirua, se bekendstelling van die projek in 2017, of - meer onlangs – toe die adjunkminister van nywerheidsontwikkeling en handel, Verna Sinimbo, vroeg in Maart vanjaar die grondleggingseremonmie van dié ontwikkeling behartig het. Nogtans het China Harbour Engineering op 27 Augustus aangedring op die terugbetaling van ’n lening van N$70 miljoen wat die maatskappy aan die IPBF gemaak het. Dit is op dié gronde dat die kontrakteur aanvoer die IPBF moet gelikwideer word. Siririka brei uit dat dit die IPBF tot Julie vanjaar geneem het om die grond in 226 erwe op te deel. Daar is ook al 32 erwe vooraf vir N$30 miljoen verkoop, sê hy. Dié geld, saam met die grond se waarde van N$242 miljoen, bewys volgens hom dat die forum nie bankrot is nie. Die oponthoud is volgens hom weens China Harbour se onwilligheid om die nodige dokumente te onderteken om die oordrag van die grond aan die nuwe eienaars toe te laat.In die vorige skikking sou China Harbour al die dokumente teken in ruil vir die terugbetaling van N$90 miljoen, maar die Chinese maatskappy het in Julie 2020 kop uitgetrek by dié skikking, luidens die hofdokumente wat hulle ingedien het. Volgens Siririka is China Harbour se weiering om te teken ‘n doelbewuste poging om die projek op te hou. Hy sê hy onderhandel tans met ander beleggers om by die projek betrokke te raak om die forum se skuld so vinnig moontlik te kan delg. Juis omdat onderhandelinge met ’n potensiële belegger belowend gelyk het, was hy vol vertroue dat die betaling voor 6 Desember sou kon plaasvind. "Ongelukkig het die belegger ons op Saterdag 3 Desember ingelig dat hulle nie meer die vermoë sou hê om die nodige waarborg vir hul belegging te bied nie. Ons en al die kopers wat reeds vir erwe betaal het, sal ernstig benadeel word as die finale bevel vir likwidasie toegestaan word,” skryf hy. Hy het ‘n dringende versoek aan regter Ueitele gerig om uitsel te gee en om vir China Harbour te dwing om die nodige dokumente te onderteken. Die saak is uitgestel, maar die nuwe hofdatum is nog nie bekend nie. Meer inligting oor die beplande slimdorp op Avis is op avissmartvillage.com.na beskikbaar. augetto@republikein.com.na

'Slimdorp' by Avis dalk IPBF se dood

Kommentaar

Republikein 2025-11-03

Meld asseblief aan om kommentaar te lewer

'Slimdorp' by Avis dalk IPBF se dood

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.