Sleutelgetuie was glo ‘onderduims’

Adam Hartman

’n Kennis van die Dippenaar-familie, mnr. Nico Smit, wat die ongeluk op 29 Desember 2014 ondersoek het, is tydens ondervraging daarvan beskuldig dat hy “onderduims” in sy ondersoek was. Mnr. Jandré Dippenaar word daarvan beskuldig word dat hy die oorsaak van die gru-ongeluk was wat die lewens van ses mense geëis het.

Dippenaar se verhoor het verlede week in die streekshof op Swakopmund hervat, met die verdediging wat vir die eerste keer sedert die saak in 2015 begin het, die kans gehad het om hul saak aan landdros Gaynor Poulton te stel.

Ses aanklagte van moord asook klagtes van roekelose of nalatige bestuur en bestuur sonder ’n geldige rybewys staar Dippenaar in die gesig.

Dippenaar en die jongste lid van ’n gesin uit Duitsland was die enigste oorlewendes. Hy ontken skuld, óf dat hy onder die invloed van drank was of roekeloos en nalatig bestuur het.

Smith het tydens sy getuienis gesê hy het ’n vriendelike verhouding met Dippenaar en sy pa gehad, wat gebaseer is op werk en ’n gedeelde belangstelling in plaaslike motorsport.

Volgens hom het Dippenaar op die oggend van 29 Desember 2014 by hom en ander aangesluit vir ’n duinerit naby Langstrand. Hy het nie gesien dat Dippenaar alkohol gebruik of dat hy dronk was soos die staat beweer nie.

Hy het later die dag nadat Dippenaar en sy vriende na Hentiesbaai vertrek het, van die ongeluk gehoor. Volgens hom was hy en Dippenaar se pa op die toneel. Hy het foto’s geneem en met ’n polisiebeampte gepraat wat gespekuleer het Dippenaar was verantwoordelik vir die ongeluk. Omdat hy ’n ondersoeker van motorongelukke is, is hy deur die versekeringsmaatskappy gevra om beweringe van dronkenskap en roekelose bestuur teen Dippenaar te ondersoek.

Die vloedgolf aantygings teen Dippenaar op sosiale media waarin hy daarvan beskuldig is dat hy ’n “moordenaar” is, het Smith aangespoor om die ondersoek te doen wat ook deur sy pa aangemoedig is.

Die ondersoek het foto’s, pad- en voertuigtoetse en onderhoude ingesluit wat opgeneem is. Laasgenoemde is opgeneem sonder dat die betrokkenes daarvan bewus was.

Tydens kruisondervraging het staatsaanklaer Faith Chipepera beweer Smith se belangstelling in en ondersoek na die ongeluk was as gevolg van sy vriendskap met die Dippenaars. Sy het ook beweer Smith het getuies aangespoor om in die guns van Dippenaar se verdediging te praat terwyl hy hulle opgeneem het.

Chipepera het beweer deur nie vir getuies te sê hulle word opgeneem nie, was hy nie deursigtig nie. Volgens haar was dit omdat hy dit as bewyse in die ondersoek wou gebruik.

“Jou betrokkenheid was onderduims weens jou belangstelling in die saak om die beskuldigde en sy pa te beskerm,” het Chipepera aan Smith gesê.

Smith het erken hy het alle gesprekke opgeneem en meen dit was nie verkeerd om nie betrokkenes hieroor in te lig nie. Volgens hom is mense baie meer versigtig oor wat hulle sê, wanneer hulle weet die gesprek word opgeneem.

Die staat sê egter die betrokkenes was nie bewus van Smith se voorneme om die opnames teen hulle te gebruik nie, wat in teenstelling met die feite kan wees.

“Ek verskil van jou bewering met die minagting wat dit verdien – dit is die staat se weergawe,” het Smith gesê. Hy het dit ook duidelik gemaak dat dit juis die feite was waarna hy gesoek het. Dippenaar het vroeër verlede week tydens sy emosionele getuienis beweer hy onthou niks van wat voor, tydens en ná die ongeluk gebeur het nie. Dit is glo te wyte aan trauma en breinbeserings. Die saak is tot Oktober uitgestel.

 – [email protected]