Senior polisielede vas vir beweerde korrupsie

Nuusredaksie – Drie senior polisiebeamptes, insluitend ’n adjunkkommissaris, is deur die Teenkorrupsiekommissie van Namibië (ACC) vasgetrek, nadat hulle na bewering omkoopgeld van N$25 000 van ’n plaaslike sakevrou geëis het. Die verdagtes wat reeds in die hof verskyn het, is Rector Sandema (51), ’n adjunkkommissaris en twee senior speurinspekteurs Martin Basson (56) en Johannes Anghuwo (49). Volgens die ACC het die drie tussen 1 Mei en 29 Julie verlede jaar glo op omkoopgeld van die sakevrou aangedring met die belofte dat hulle haar sal help om haar voertuig terug te kry wat na bewering onder valse voorwendsels gesteel is.Die Namibiese polisie het in daardie stadium die voertuigsaak aktief ondersoek. Die polisiebeamptes het in die landdroshof in Windhoek verskyn op aanklagte van die oortreding van die teenkorrupsiewet deurdat hulle hul kantoor en amp op ’n korrupte wyse vir persoonlike gewin gebruik het.Hulle is borgtog geweier weens kommer dat hulle moontlik met die voortgesette ondersoek kan inmeng. Klem is ook daarop gelê dat hul vrylating nie die belange van geregtigheid sal dien nie. Die saak is tot Vrydag vir ’n aansoek om borgtog uitgestel. GEWESE SKOOLHOOFIn ’n afsonderlike geval is Richard Geiseb (51), 'n voormalige skoolhoof by die Kolin Foundation Secondary School op Arandis, op 17 Februarie vanjaar in hegtenis geneem weens bewerings van die wanbesteding van openbare fondse, bedrog, diefstal en geldwassery. In ’n ondersoek wat in 2017 begin het, word Geiseb daarvan beskuldig dat hy tjeks aan instansiewerkers uitgereik het, wat dit toe na bewering gewissel en onder mekaar verdeel het, moontlik met behulp van vervalste handtekeninge. Die totale bedrag wat by die aanklagte betrokke is, is N$320 000. Geiseb, wat op borgtog van N$50 000 vrygelaat is, sal Vrydag weer in die hof verskyn.ADMINISTRATEURNog ’n individu wat by korrupsie betrek word, is Anna Nuwuseb (46), ’n administratiewe beampte by die Primêre Skool Tobias Hainyeko, wat op 6 Februarie 2025 in hegtenis geneem is ná ’n ondersoek na bewerings dat sy omkoopgeld van altesaam N$8 280 aanvaar het om skooltoelating te vergemaklik. Die betalings het gewissel tussen N$400 en N$1 000 per individu, het die ACC gesê. Sy is borgtog van N$5 000 in die landdroshof in Windhoek toegestaan en sal na verwagting weer op 17 Maart in die hof verskyn. NUTSMANDie ACC het ook Kefas Amutenya (47), ’n nutsman by die ministerie van landbou, water en grondhervorming, in Januarie in hegtenis geneem. Amutenya het na bewering op omkoopgeld van N$300 aangedring om ’n gemeenskapslid se watermeter van die Etuli-nedersetting in Oshikoto te koppel. Dis sy tweede arrestasie vir omkopery, nadat hy op ’n soortgelyke klag in April verlede jaar in die hof verskyn het. Ten tyde van sy jongste arrestasie was Amutenya uit op borgtog van N$2 000. Hy is tydens sy jongste verskyning in die hof op Ondangwa borgtog geweier en die saak is vir verdere ondersoek tot 16 Julie uitgestel. – republikein@republikein.com.na

Senior polisielede vas vir beweerde korrupsie

Kommentaar

Republikein 2025-11-03

Meld asseblief aan om kommentaar te lewer

Senior polisielede vas vir beweerde korrupsie

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.