Selfdegeslag-pare wag op hof se uitspraak
Appèlaansoek in die hooggeregshof
Twee paartjies in selfdegeslagverhoudings wat wettiglik in ander lande getrou het, poog weer eens om hul huwelike in Namibië erken te kry.
Twee egpare van selfdegeslaghuwelike het verlede week in die hooggeregshof hul regstyd teen die ministerie van binnelandse sake, immigrasie, veiligheid en sekuriteit voortgesit om hul huwelike in Namibië erken te kry.
Die Namibiër Johann Potgieter en Suid-Afrikaner Daniel Digashu, asook die Namibiër Anette Seiler en Duitser Anita Seiler-Lilles, appelleer teen ’n hoërhofuitspraak wat in Januarie 2022 gelewer is waarin hul aansoek vir hul huwelike om in Namibië erken te word, van die hand gewys is. Die hof het ook beslis dat die buitelandse eggenote nie verblyfreg in Namibië kan verkry nie.
Vyf regters van die hooggeregshof, insluitend hoofregter Peter Shivute, adjunkhoofregter Petrus Damaseb en regters Sylvester Mainga, Elton Hoff en Dave Smuts, het Vrydag die appèlaansoek aangehoor. Die datum waarop die uitspraak gelewer sal word, sal eers bekend gemaak word wanneer die uitspraak gereed is.
HOËRHOFUITSPRAAK
Die drie regters van die hoërhof wat aanvanklik die twee egpare se aansoek van die hand gewys het, het glo hul beslissing op ’n hooggeregshofuitspraak van 2001 gebaseer wat stel dat selfdegeslagverhoudings nie in Namibië se Grondwet erken word nie en dat selfdegeslag-egpare nie as ’n gesin op gelyke voet met heteroseksuele egpare beskerm word nie.
Die regters het egter gesê dat hulle nie met die 2001-uitspraak saamstem nie, maar was nietemin aan daardie beslissing gebonde.
ARGUMENTE
Advokaat Raymond Heathcote, wat Potgieter, Digashu, Seiler en Seiler-Lilles verteenwoordig, het tydens verlede week se verrigtinge aangevoer dat daar in die 2001-saak verkeerdelik beslis is.
Hy het aangevoer dit is ’n sosiale status om deel van ’n seksuele minderheid in Namibië te wees en die Grondwet verbied diskriminasie op grond van sosiale status. Hy beweer verder dat die ministerie selfdegeslaghuwelike as minderwaardig teenoor heteroseksuele huwelike ag en dit kom glo neer op onbillike diskriminasie.
Healthcote het ook beklemtoon dat hierdie appèlaansoek nie versoek dat selfdegeslaghuwelike in Namibië gewettig moet word nie, maar dat selfdegeslaghuwelike wat in ander lande wettiglik gesluit is, kragtens die Namibiese Grondwet beskerm word.
Die regsverteenwoordiger van die ministerie, advokaat Griffits Madonsela, het aangevoer dat ’n gesin, soos uiteengesit in die Grondwet, en die term “eggenoot”, soos gebruik in die wet op immigrasiebeheer, nie mense in selfdegeslagverhoudings insluit nie.
– [email protected]
Die Namibiër Johann Potgieter en Suid-Afrikaner Daniel Digashu, asook die Namibiër Anette Seiler en Duitser Anita Seiler-Lilles, appelleer teen ’n hoërhofuitspraak wat in Januarie 2022 gelewer is waarin hul aansoek vir hul huwelike om in Namibië erken te word, van die hand gewys is. Die hof het ook beslis dat die buitelandse eggenote nie verblyfreg in Namibië kan verkry nie.
Vyf regters van die hooggeregshof, insluitend hoofregter Peter Shivute, adjunkhoofregter Petrus Damaseb en regters Sylvester Mainga, Elton Hoff en Dave Smuts, het Vrydag die appèlaansoek aangehoor. Die datum waarop die uitspraak gelewer sal word, sal eers bekend gemaak word wanneer die uitspraak gereed is.
HOËRHOFUITSPRAAK
Die drie regters van die hoërhof wat aanvanklik die twee egpare se aansoek van die hand gewys het, het glo hul beslissing op ’n hooggeregshofuitspraak van 2001 gebaseer wat stel dat selfdegeslagverhoudings nie in Namibië se Grondwet erken word nie en dat selfdegeslag-egpare nie as ’n gesin op gelyke voet met heteroseksuele egpare beskerm word nie.
Die regters het egter gesê dat hulle nie met die 2001-uitspraak saamstem nie, maar was nietemin aan daardie beslissing gebonde.
ARGUMENTE
Advokaat Raymond Heathcote, wat Potgieter, Digashu, Seiler en Seiler-Lilles verteenwoordig, het tydens verlede week se verrigtinge aangevoer dat daar in die 2001-saak verkeerdelik beslis is.
Hy het aangevoer dit is ’n sosiale status om deel van ’n seksuele minderheid in Namibië te wees en die Grondwet verbied diskriminasie op grond van sosiale status. Hy beweer verder dat die ministerie selfdegeslaghuwelike as minderwaardig teenoor heteroseksuele huwelike ag en dit kom glo neer op onbillike diskriminasie.
Healthcote het ook beklemtoon dat hierdie appèlaansoek nie versoek dat selfdegeslaghuwelike in Namibië gewettig moet word nie, maar dat selfdegeslaghuwelike wat in ander lande wettiglik gesluit is, kragtens die Namibiese Grondwet beskerm word.
Die regsverteenwoordiger van die ministerie, advokaat Griffits Madonsela, het aangevoer dat ’n gesin, soos uiteengesit in die Grondwet, en die term “eggenoot”, soos gebruik in die wet op immigrasiebeheer, nie mense in selfdegeslagverhoudings insluit nie.
– [email protected]
Kommentaar
Republikein
Geen kommentaar is op hierdie artikel gelaat nie