President van NTTU weer in hof

Die president van die Namibiese Vervoer- en Taxivakbond (NTTU), mnr. Werner Januarie, is vurig in twee hofsake betrokke in die hoërhof in Windhoek.Die eerste is ’n eis van N$75 miljoen teen die voormalige minister van binnelandse sake, immigrasie, veiligheid en sekuriteit, waaroor Republikein verlede jaar berig het, en die ander is ’n hofsaak om toesig van twee minderjarige kinders te verkry waarvan hy na bewering die biologiese pa is, ten spyte daarvan dat die kinders se geboortesertifikate ’n ander naam aandui.Januarie beweer dat die kinders se ma en haar familie, asook die “pa”, soos aangedui op die geboortesertifikate, dit vervals het.“Daar is tans iemand op bedrieglike wyse by die registrasie van geboorte as die vader van die kinders geregistreer. Sodanige registrasie het eers plaasgevind nadat ek die proses begin het om die ouerskap van die kinders te bepaal.”Januarie het op DNS-toetse aangedring, maar die ma van die kinders het dit onmoontlik gemaak. Hy beweer die kinders se geboorte was toe nog nie geregistreer nie.Hy beskuldig die ma en die vermeende pa van regsverydeling en gaan so ver as om hulle van kinderbedreiging, kinderuitbuiting en kinderhandel te beskuldig en dring daarop aan dat die hof strafregtelike sanksies teen hulle en nege ander mense, insluitend familielede van die ma, oplê.“Wanneer al die verdagtes in hegtenis geneem is, pleit ek dat borgtog nie onmiddellik toegestaan word totdat die veiligheid van die kinders nie gewaarborg kan word nie.”Januarie beweer die ma van die kinders en haar familie, lieg oor wie die pa van die kinders is.“Hulle is gereed om enigiets te doen om hul leuens te beskerm, insluitend om skade aan my te berokken, &#039;n vrees wat deur hul dreigemente en intimidasies bewys word,” lui Januarie se verklaring.EIS TEEN DIE MINISTERIEVolgens hofstukke, het Januarie tydens ’n ontmoeting met staatsprokureurs, waartydens die wysiging van sy eis teen die ministerie bespreek moes word, gewelddadig opgetree en uitgestorm.Januarie was onder die indruk ’n ander kwessie sou bespreek word en was glo nie bereid om oor die betrokke saak te praat nie.“Hy was uiters vyandig en onwillig om te luister. Hy was &#039;n paar keer gevra om sagter en met respek te praat waarna hy net nog meer aggressief geraak het,” lui die staatsprokureurs se verklaring in hofstukke.Regter Esi Schimming-Chase het verlede jaar vir Januarie beveel om sy eis te wysig voordat die saak verhoor kan word.Hy eis N$75 miljoen nadat hy in 2020 in hegtenis geneem is toe hy na bewering die Covid-19-regulasies verontagsaam het.Dit volg nadat hy verlede jaar tydens Namibië se vlak 3 Covid-19-regulasies in hegtenis geneem is omdat hy nie sy masker gedra het nie.Hy beweer &#039;n lid van die polisiemag en lede van die weermag het hom aangerand, geteister en gedreig.Die eis was aanvanklik vir N$10 miljoen vir skending van sy menswaardigheid; N$10 miljoen vir die skending van sy menseregte en vryheid, N$20 miljoen vir emosionele skade en sielkundige lyding wat hy moes verduur, N$5 miljoen vir kwaadwillige inhegtenisneming, N$5 miljoen vir wrede en vernederende behandeling en laastens N$7 miljoen vir agterstallige inkomste en ontneming van werk.Die respondente in die saak is mnr. Frans Kapofi, die voormalige minister van binnelandse sake, immigrasie, veiligheid en sekuriteit; die nasionale polisiehoof, lt.genl.Sebastian Ndeitunga; die aanklaer-generaal, me. Martha Himalwa; die prokureur-generaal, mnr. Festus Mbandeka en president Hage Geingob. Die partye het gister in die hof verskyn vir voorverhoorverrigtinge.In Januarie se hofstukke wou hy ook die hof in kennis stel dat die saak van groot belang is omdat die kinders ’n kans het om baie te erf wanneer hy die skadevergoedingseis van die ministerie ontvang.“Die kinders moet nie beroof word en die geleentheid misloop as gevolg van kwessies buite hul beheer nie.”– kristien@republikein.com.na

President van NTTU weer in hof

Kommentaar

Republikein 2026-05-05

Meld asseblief aan om kommentaar te lewer

President van NTTU weer in hof

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.