Pleitonderhandelinge onder die soeklig

Vandag vergader die Namibiese regbank met belanghebbers vanaf die wetgewers, die uitvoerende gesag, prokureurs, die akademie, die Vereniging van Advokate, die aanklaer se kantoor en verskeie ander belanghebbendes in die strafregstelsel.Die eerste nasionale konferensie oor alternatiewe geskilbeslegting word in die hoofstad gehou onder die tema “Verbetering van toegang tot geregtigheid deur pleitonderhandelinge: Lesse, vooruitsigte en praktiese oplossings”.Hoofregter Peter Shivute het gister sy eweknie van Uganda, hoofregter Alfonse Chigamoy Owiny-Dollo, by die hooggeregshof in Windhoek verwelkom. Owiny-Dollo sal vandag die hoofspreker by die konferensie wees.Shivute het gister gesê alternatiewe geskilbeslegting word toenemend relevant in moderne hofstelsels oraloor die wêreld.“Hierdie meganismes bied buigsaamheid, verminder koste en bied doeltreffende kanale vir geskilbeslegting.“Terwyl dit tradisioneel met siviele en kommersiële sake geassosieer word, word die beginsels van alternatiewe geskilbeslegting, soos dialoog, onderhandelinge en wedersydse skikking, toenemend binne die strafregstelsel toegepas,” het hy gesê.Shivute het verder gesê: “Pleitonderhandeling bied veral ’n alternatiewe roete om strafregtelike sake op te los, sonder die behoefte aan ’n volledige verhoor.“Wanneer dit met die toepaslike voorsorgmaatreëls geïmplementeer word, het dit die potensiaal om hofagterstande te verminder, doeltreffendheid te verbeter en te verseker dat geregtigheid geskied terwyl die regte van alle betrokke partye beskerm word.”Uganda is ’n leier in Afrika in die toepassing van pleitonderhandelinge en alternatiewe geskilbeslegting in die hofpraktyk.Shivute sê Uganda se ervaring met die implementering van pleitonderhandelinge is “’n reis wat ’n verwysingspunt vir talle oraloor die vasteland geword het.”Volgens die woordvoerder van die kantoor van die regbank, Vikitoria Hango, sal lede van Owiny-Dollo se afvaardiging, insluitend Uganda se topregter in beheer van pleitonderhandelinge, die voorsitter en ook die direkteur van Uganda se regsopleidingsraad, hul ervaring met deelnemers aan vandag se verrigtinge deel.Sy sê Namibië sal lesse uit Uganda se ervaring kan leer en kyk wat plaaslik toegepas kan word.“Ons stelsel het tans nie pleitonderhandelinge nie en die naaste wat ons aan alternatiewe geskilbeslegting kom, is bemiddeling,” brei sy uit.Namibië se regbank het gister ’n Memorandum van Verstandhouding (MoU) met die regbank van Uganda onderteken.Shivute het gesê die ooreenkoms sal die uitruil van inligting oor rekenaargebaseerde regstelsels, alternatiewe geskilbeslegting, insluitend pleitonderhandelinge vir strafsake, en die versterking van institusionele kapasiteit en prestasie deur samewerking tussen die twee lande se regstelsels, vergemaklik.Samewerking tussen die regbanke van Namibië en Uganda het reeds die afgelope maande uitgebrei, sê Shivute. – augetto@nmh-hub.com.na

Pleitonderhandelinge onder die soeklig

Kommentaar

Republikein 2025-12-17

Meld asseblief aan om kommentaar te lewer

Pleitonderhandelinge onder die soeklig

Kommentaar

Republikein 2025-12-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.