PDM se aansoek teen Comsar misluk

Die Popular Democratic Movement (PDM) het gefaal in sy hoërhofaansoek om ’n 99 jaar-huurkontrak vir sowat 17 000 hektaar grond in die Dordabis-omgewing aan Comsar Properties SA, ’n maatskappy wat aan die Russiese miljardêr Rashid Sardarov behoort, tersyde te laat stel.Regter Orben Sibeya het Vrydag beslis dat die PDM “nie geregtig was” op die verligting wat hulle van die hof versoek het nie. Die PDM het in die hof beweer dat Comsar sowat N$24 miljoen aan die regering geskenk het in ruil vir die huurkontrak.Die PDM se regsverteenwoordiger, Jean Marais, het in die hof gesê ’n 99 jaar-huurkontrak is gelykstaande aan eienaarskap. Marais het verder aangevoer dat ’n huurkontrak vir hierdie tydperk langer as die gemiddelde mens se leeftyd duur en dus gelykstaande is aan eienaarskap. Hy het verduidelik dat ’n tydperk van byvoorbeeld 30 jaar nie gelykstaande sou wees aan eienaarskap nie. Die PDM het in die hof beweer die regering en Comsar het dit noukeurig beplan met die doel om bestaande wette rakende grondeienaarskap te omseil. Volgens die wet op grondhervorming mag buitelanders nie grond in Namibië besit nie, maar die minister kan uitsonderings op die wet maak. Comsar het onderskeidelik N$43 miljoen en N$118 miljoen aan die eienaars van die plase Rainhof en Wolffsgrund betaal en eienaarskap is aan die regering oorgedra. Comsar se regsverteenwoordiger, Wim Trengove, het aan Sibeya gesê die PDM se aansoek om die toekenning van die 99 jaar-huurkontrak ter syde te laat stel, maar nie om die verkoop van die plase ongedaan te maak nie, “is soos om ’n roereier weer te herstel (unscramble)”.“Wat nie betwis word nie, is dat Comsar, nadat die plase beset is, aansienlike verbeterings, beleggings en ontwikkeling insluitend konstruksie en infrastruktuur, die aankoop van wild en die oprigting van ’n omgewingsvriendelike hotel en bykomende lodges, aangebring het. Comsar het ook verskeie werknemers in diens geneem,” het Sibeya in sy uitspraak gesê.Die regter het beslis dat die PDM nie die regskoste van die partye wat gedagvaar is, hoef te betaal nie, aangesien die PDM gesê het dat hulle geen direkte belange in die aansoek het nie, maar dat hulle die aansoek in die openbare belang gebring het. Die luukse Marula Lodge word tans op die grond bedryf. – irene-mari@nmh-hub.com.na

PDM se aansoek teen Comsar misluk

Kommentaar

Republikein 2025-12-18

Meld asseblief aan om kommentaar te lewer

PDM se aansoek teen Comsar misluk

Kommentaar

Republikein 2025-12-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.