#PasIn: Strafbare manslag-verhoor ná dood van fietsryer begin vandag

Die man wat teregstaan op ’n klag van strafbare manslag in verband met die noodlottige tref-en-trap-ongeluk op die westelike verbypad waarin die fietsryer me. Ingrid van Wyk Scholtz (38) sowat drie jaar gelede gesterf het, se verhoor sal na verwagting môre in die Katutura-landdroshof begin. Die staat beweer dat Paulus Kambata ’n voertuig met sy swart Mercedes aan die linkerkant verbygesteek het en Scholtz op haar fiets binne die geel sperstreep van agter gestamp het. Hy het glo daarna weggejaag. Kambata staan ook tereg op klagte van roekelose en/of nalatige bestuur, dwarsboming van die gereg en klagte ten opsigte van sy versuim om te stop, te help, beserings vas te stel of die voorval te rapporteer.