Pa skuldig bevind aan dogter se verkragting

’n Vier-en-vyftigjarige man is gister in die hoërhof in Windhoek skuldig bevind aan die verkragting van sy dogter en bloedskande. Regter Claudia Claasen het beslis dat die getuienis van die vrou wat deur haar pa verkrag is toe sy nog minderjarig was – ondanks die feit dat sy die saak in ’n stadium teruggetrek en vir die polisie gejok het – steeds geloofwaardig is.Die man is egter onskuldig bevind op al drie aanklagte van kinderhandel wat die staat teen hom gebring het, met bewerings dat hy sy dogter onwettig tussen Namibië en Angola vervoer het.Claasen het in haar uitspraak twee redes hiervoor aangevoer, naamlik dat die voorvalle wat die staat beweer kinderhandel is, plaasgevind het voor die wetgewing waarop die man aangekla is in werking getree het en dat die meisie se ouers ooreengekom het dat sy van Windhoek na Angola sou trek en haar skoolloopbaan daar sou voortsit.Claasen het die man ook onskuldig bevind op ’n klag van aanranding deur dreigement weens die feit dat die dogter en haar ma se getuienisse teenstrydig was.Die dogter het beweer daar is in Januarie 2013 ’n dreigement per SMS aan haar gemaak – sy het dié dreigement in haar verklaring aan die polisie genoem.Haar ma het getuig oor ’n dreigement wat die man tydens ’n konfrontasie voor die ma en dogter in Desember 2012 gemaak het. Die dogter het ook oor laasgenoemde getuig, maar hul getuienisse het twee verskillende weergawes gebied van wie die teiken van die dreigement was.Die dogter het beweer haar pa het haar tussen 2010 en 2012 herhaaldelik verkrag. Sy het getuig dat hy haar vir die eerste keer verkrag het toe sy 15 jaar oud was en hulle op Jakkalsputz met vakansie was.Sy het in 2012 toe sy in Windhoek was vir haar tannie gesê haar pa “maak haar sy vrou”.Sy is na ’n sielkundige geneem voordat die nuus met haar ma gedeel is. ’n Dokter het daarna bevind sy is swanger en ’n wettige aborsie is uitgevoer.Die hoof- forensiese beampte van die Namibiese polisie se Forensiese Wetenskapsinstituut, Maryn de Klerk, het getuig sy het DNS-profilering op die plasenta gedoen en gevind daar is ’n 99,996% kans dat die man die baba se pa is.DNS-toetse het ook bewys dat die kans dat die man die dogter se biologiese pa was, 99,986% is. Daar sal na verwagting op 23 Oktober finale betoë voor vonnisoplegging gelewer word. – irene-mari@nmh-hub.com.na

Pa skuldig bevind aan dogter se verkragting

Kommentaar

Republikein 2025-05-01

Meld asseblief aan om kommentaar te lewer

Pa skuldig bevind aan dogter se verkragting

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie