Ouers wen saak teen DHPS

“Dit is inderdaad ’n hartseer dag wanneer ’n hof versoek word om ’n besluit te neem oor die welstand van ’n kind en die verhouding tussen ’n skool en hul plig om te sorg vir ’n onderwyser en ’n kind. “In hierdie saak is die kind se belang op die spel en is die hof hoofsaaklik gelei deur wat in die beste belang van die kind is.”So het regter Eileen Rakow Vrydag in haar uitspraak gesê in die dringende aansoek wat ouers teen die Deutsche Privatschule Windhoek (DHPS) gebring het. Die ouers, wat beide advokate in Windhoek is, het aangevoer dat ’n onderwyseres hul 16-jarige seun boelie en dit ’n impak op sy welstand het. Hulle het die hof versoek vir ’n bevel wat die skool sal verplig om hom na ’n ander graad-10 klas te skuif waar hy nie meer by die betrokke onderwyseres sou klas hê nie en hul aansoek het geslaag.Rakow het in ’n hofbevel die skool verplig om die kind te skuif en het ook beveel dat die skool die regskoste vir die aansoek moet betaal.AGTERGRONDDie seun is sedert kleuterskool in DHPS en is nog altyd in die Duitse stroom. Aan die begin van die jaar is hy in die Duitse International Arbitur (DIA)-kurrikulum geplaas en die skool het glo die ouers verseker dat hy voldoende ondersteuning in Duits sal ontvang aangesien die ouers ’n beperkte begrip van Duits het.Die betrokke onderwyseres teen wie die aansoek gebring is, het verlede jaar reeds haar kommer uitgespreek oor die kind se vermoë om Duits as vak te bemeester. “Sy was van mening dat die kind nie goed genoeg was vir DIA nie. Sy het die ouers aangeraai om hom eerder in die Cambridge (Engelse) stroom te plaas,” lui die samevatting in Rakow se uitspraak.Dié onderwyseres het sedert die begin van die jaar vir die kind geskiedenis en Duits as vak aangebied. Die ouers het die skool versoek om die kind na ’n ander klas in die DIA-stroom te skuif op grond van die onderwyseres se houding teenoor hul seun. Die skool het geweier.Die skool het aangevoer om die kind na ’n ander klas te skuif sal hom nog meer spanning veroorsaak wat sy skoolwerk verder kan beïnvloed.SKOOLDie skool se hoof van administrasie het ’n verslag ingedien wat sê dat daar geen afknouery of skade teen die kind gepleeg word nie.“Duits is die kind se tweede taal en sal natuurlik baie harder moet werk, as byvoorbeeld ’n kind waar Duits sy eerste taal is. Solank as wat die kind met Duits en geskiedenis sukkel, sal hy negatiewe subjektiewe gevoelens en persepsies oor daardie vakke hê, ongeag wie die onderwyser is.”‘KIND VOEL GEBOELIE’Die ouers het gevoel dat die verhouding tussen hul kind en die onderwyseres tot so ’n mate versleg het dat die teenwoordigheid van hom in haar klas sy emosionele en psigologiese welstand nadelig beïnvloed. Hulle het die kind na ’n sielkundige geneem wat bevind het dat hy aansienlike vrees en frustrasie met Duits en geskiedenis ervaar.“Hierdie vakke word deur ’n onderwyser aangebied wat die kind voel nie van hom hou nie. Dit laat hom angstig en magteloosheid voel oor sy akademiese prestasies in hierdie vakke. “Hy vertrou nie meer hierdie onderwyser nie en voel gediskrimineer en geboelie deur haar,” lui die sielkundige se verslag.Hy het verder bevind selfs al word die kind nie werklik geboelie nie dit steeds tot sy subjektiewe ervaring bydra wat sy werklikheid oorheers. “Emosionele ervarings word gekonstrueer deur interpretasie en kognitiewe assesserings van situasies,” het die sielkundige gesê.Hy het aanbeveel dat dit noodsaaklik is om kontak tussen die kind en die onderwyser te beperk om te verseker dat hy sy skoolloopbaan suksesvol kan voltooi en om sy optimale welstand te handhaaf.UITSPRAAKRakow het in haar uitspraak daarop gewys dat die verhouding tussen die kind en sy ouers met die onderwyser tot so ’n mate versleg het dat dit waarskynlik nie maklik herstelbaar is nie. “Die hof is tevrede dat die applikant [ouers] inderdaad ’n saak vir tussentydse regshulp uitgemaak het deurdat hulle duidelik getoon het dat hulle ’n prima facie-reg het wat moontlik kan lei tot onherstelbare skade is indien die tussentydse regshulp nie toegestaan word nie.”Met betrekking tot die onherstelbare skade het die kind se ouers aangevoer dat hul kind alle emosionele en sielkundige gevoelens van afknouery toon. “Hy is in ’n kritieke stadium van sy akademiese loopbaan. Dit is redelik om te begryp dat voortgesette emosionele nood as gevolg van die versuim om die geïdentifiseerde probleem te takel, onherstelbare skade sal aanrig.”– kristien@nmh-hub.com.na

Ouers wen saak teen DHPS

Kommentaar

Republikein 2025-04-30

Meld asseblief aan om kommentaar te lewer

Ouers wen saak teen DHPS

Kommentaar

Republikein 2025-04-30

Meld asseblief aan om kommentaar te lewer

MELD AAN

Advertensie