Oudspeurder tronk toe vir omkopery

Die voormalige Walvisbaaise polisiespeurder Jafet Simon is tot twee jaar gevangenisstraf gevonnis nadat hy skuldig bevind is daaraan dat hy aan ’n omkoopskema deelgeneem het. Die omkoopskema het N$60 000 en ’n staatsaanklaer behels, in ’n poging om met ’n mensehandel- en verkragtingsaak in te meng.Die streekhoflanddros van Walvsibaai, Vicky Nikolaidis, het Vrydag Simon se vonnig opgelê nadat sy hom vroeër ingevolge die teenkorrupsiewet skuldig bevind het.Die saak het sy oorsprong in ’n 2018-strafsaak waarin die Pakistanse burger Farhan Khatri en twee Namibiese vroue vir mensehandel en die verkragting van ’n minderjarige in Walvisbaai vervolg is. Khatri en die twee vroue is uiteindelik skuldig bevind en tot 20 jaar gevangenisstraf gevonnis.Die kern van die korrupsiesaak was ’n beweerde poging om die aanklaer, Tresia Hafeni, te beïnvloed om óf die strafsaak te laat verdwyn óf te bewerkstelling dat Khatri se paspoort aan hom teruggegee word sodat hy die land kon verlaat.Die hof het aangehoor dat Simon, wat die ondersoekbeampte in die mensehandel- en verkragtingsaak was, by vergaderings tussen Khatri en Hafeni betrokke geraak het. Bewyse het getoon dat N$60 000 na bewering aangebied is in ruil vir hulp in die saak.Die helfte van die geld is na bewering by Hafeni se huis aan haar oorhandig, waarna sy haar meerderes en die Teenorrupsiekommissie van Namibië (ACC) onmiddellik ingelig het. Die hof het aangehoor dat die ACC toe ’n lokvaloperasie van stapel gestuur het.Die oorblywende N$30 000 is later by Hafeni se kantoor by die streekhof afgelewer. Simon het die geld in ’n bruin koevert gebring en Khatri se paspoort ontvang, voordat hy deur die ACC in hegtenis geneem is toe hy die kantoor verlaat het.Simon het ontken dat hy korrup opgetree het en het deurgaans die verhoor volgehou dat hy self probeer het om die saak te ondersoek nadat hy na bewering besef het dat daar kriminele optrede plaasvind.Hy het aangevoer dat hy probeer het om beide Khatri en Hafeni op heterdaad te betrap en het beweer dat hy bloot die interaksies tussen hulle as deel van ’n informele ondersoek gefasiliteer het.Nikolaidis het daardie weergawe verwerp.“U erken die meeste van die gebeure, maar ontken dat u korrup opgetree het. Ek bevind dat u optrede, sodra hierdie korrupsie aan die lig gebring is, heeltemal in teenstelling gestaan het met Hafeni se optrede,” het die landdros tydens uitspraak gesê.Sy het daarop gewys dat Hafeni die owerhede onmiddellik ingelig en met die ACC saamgewerk het, terwyl Simon versuim het om die saak aan te meld, bewyse te dokumenteer of enige formele polisieproses aan die gang te sit.“U optrede maak my wantrouig teenoor u storie en u weergawe,” het Nikolaidis gesê voordat sy hom op die omkoopklag skuldig bevind het.Simon het ook ’n aanklag van dwarsboming van die gereg in die gesig gestaar, maar is op daardie aanklag vrygespreek.Tydens vonnisverrigtinge het die staat aangevoer dat Simon se optrede ’n ernstige skending van openbare vertroue is, omdat hy ’n ervare polisiebeampte was wat die taak gehad het om die regstelsel te beskerm. Aanklaers het aangevoer dat korrupsie deur wetstoepassingsbeamptes die publiek se vertroue in regspleging ondermyn en direkte tronkstraf regverdig.Simon se regsverteenwoordiger, Albert Titus, het vir ’n boete of opgeskorte vonnis vir sy kliënt gepleit en Simon se status as ’n eerste oortreder aangedui, asook die meer as drie jaar wat hy in aanhouding voor sy verhoor deurgebring het voordat borgtog uiteindelik aan hom toegestaan is.Die verdediging het verder aangevoer dat Simon nie persoonlik finansieel uit die skema voordeel getrek het nie en bloot die transaksie namens Khatri gefasiliteer het.Die hof het hom egter uiteindelik ’n direkte vonnis van twee jaar gevangenisstraf opgelê.– adam@erongo.com.na

Oudspeurder tronk toe vir omkopery

Kommentaar

Republikein 2026-05-26

Meld asseblief aan om kommentaar te lewer

Oudspeurder tronk toe vir omkopery

Kommentaar

Republikein 2026-05-26

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.