Oudlanddros eis oor aanhouding ná parool
Die voormalige Windhoekse landdros, Hileni Kavara, eis N$5 miljoen se skadevergoeding van die regering en beweer dat sy onwettig terug tronk toe gestuur is en daar vir agt maande aangehou is nadat haar parool in April 2023 herroep is.
Kavara dagvaar die kommissaris-generaal van die Namibiese Korrektiewe Diens (NCS), die voorsitter van die paroolraad, die beampte in beheer van die Windhoekse vrouegevangenis en die minister van binnelandse sake, immigrasie, veiligheid en sekuriteit.
Kavara het tronkstraf van twee-en-’n-half jaar uitgedien nadat sy in 2021 skuldig bevind is aan aanklagte van dwarsboming van die gereg en die korrupte gebruik van ’n valse dokument.
Die skuldigbevindings het voortgespruit uit haar ingryping in die kokaïenhandel-saak van haar destydse kêrel, Mohammed Shabani.
Die hof het bevind dat sy ’n teruggedateerde inskrywing op die hofrekord gemaak het om sy borgtog van N$50 000 wat aan die staat verbeurd verklaar is, te herstel nadat hy versuim het om in die hof te verskyn.
Dokumente wat verlede maand by die hoërhof ingedien is en deur Republikein gesien is, toon dat Kavara op 24 Februarie 2023 op parool vrygelaat is nadat sy ’n deel van haar vonnis uitgedien het.
Sy sê sy het na die samelewing teruggekeer met die bedoeling om haar lewe weer op te bou, en dat sy aan die voorwaardes verbonde aan haar parool voldoen het.
“Ek het onder toesig van korrektiewe owerhede gebly soos deur die voorwaardes van my parool vereis,” verklaar Kavara.
Sy het gesê sy is nooit ingelig dat sy ’n paroolvoorwaarde oortree het wat haar terugkeer tronk toe sou regverdig nie.
Die geskil het in April 2023 ontstaan nadat Kavara in hegtenis geneem is op bewerings van crimen injuria en aanranding deur dreigemente ná ’n konfrontasie waarby amptenare by die kantoor van die meester van die hoërhof betrokke was.
Kavara is die dag daarna in kennis gestel van die klag wat teen haar aanhangig gemaak is en is later in hegtenis geneem.
Sy het in die Windhoekse landdroshof verskyn, maar nadat Kavara egter daarna weer op borgtog van N$1 000 vrygelaat is, is sy weer in hegtenis geneem op grond van die bewering dat sy haar paroolvoorwaardes oortree het.
Sy voer aan dat die bewerings nie bewys is nie en dat die owerhede nietemin voortgegaan het om haar parool te herroep. Volgens haar verklaring is die besluit geneem sonder dat sy ’n behoorlike geleentheid gekry het om te reageer.
“Ek is in werklikheid van ’n geleentheid ontneem om die bewerings te betwis vóór die herroeping van my parool en die gevolglike ontneem van my vryheid,” het Kavara gesê.
Sy het na die Windhoekse vrouegevangenis teruggekeer, waar sy tot Desember 2023 agter tralies was – van 25 April tot 20 Desember 2023.
VRYGESPREEK
Die saak van aanranding teen Kavara het uiteindelik in die Windhoek-landdroshof voortgegaan en sy is op 13 Desember 2023 vrygespreek.
Kavara sê die strafregtelike aanklagte het die grondslag gevorm waarop die owerhede die herroeping van haar parool geregverdig het.
“Na die aanhoor van die saak is ek vrygespreek van die strafregtelike aanklagte wat die basis gevorm het waarop die verweerders voorgegee het om die herroeping van my parool te regverdig,” het sy gesê.
Sy sê ondanks haar vryspraak sy steeds aangehou is. Kavara het die hoërhof genader en ’n bevel gesoek wat die herroeping van haar parool onwettig verklaar en haar vrylating gelas.
Volgens Kavara se jongste verklaring het die hoërhof uiteindelik die herroeping van haar parool onwettig verklaar en haar vrylating beveel.
“Die hoërhof het die herroeping van my parool onwettig verklaar en my onmiddellike vrylating gelas. Die bevel bly van krag, bindend en onbestrede,” het sy gesê.
SKADEVERGOEDING
Kavara is die dogter van wyle Rosa Kavara, Swapo-raadslid en lid van die parlement.
Die voormalige landdros wil N$5 miljoen se skadevergoeding hê – opgebreek in vergoeding vir die ontneming van haar vryheid, emosionele en sielkundige lyding, skade aan haar reputasie en verlore geleenthede.
Kavara sê die voortgesette aanhouding het haar vermoë beïnvloed om haar lewe weer op te bou nadat sy op parool vrygelaat is.
“Hoe langer die ontneming van vryheid voortgeduur het, hoe groter het die emosionele, sielkundige en maatskaplike gevolge geword,” het sy gesê.
NCS BETWIS HAAR WEERGAWE
Die adjunkbedryfsbeampte by die vrouegevangenis, Vivian Masiye, het ’n ander prentjie van Kavara se gedrag tydens aanhouding geskets. Sy sê toe Kavara ná haar herarrestasie na haar kantoor gebring is, was sy ontsteld.
“Kavara was ontsteld, het aanhoudend beledigings geslinger dat sy moeg is om deur Capriviane gejag te word en het oneerbiedige opmerkings oor my en albei my ouers gemaak.
“Ek het haar gevra hoekom sy so optree en sy het aangedui die persoon wat die saak teen haar aanhangig gemaak het (die klaer), ook ’n Capriviaan is en sy het blykbaar gevoel sy word gejag,” het Masiye gesê.
Sy sê sy het Kavara oor haar gedrag uitgevra en dat sy later om verskoning gevra het.
“Sy het later berou oor haar oneerbiedige houding getoon. Ten spyte van die eiser se gedrag het die owerheid haar van al haar basiese behoeftes voorsien.
“Daar was geen punt daarin om die eiser anders as ander gevangenes te behandel nie en alle prosedures is gevolg en professionaliteit is gehandhaaf,” het Masiye verduidelik.
Kavara het vanaf 2013 as landdros gedien tot haar skorsing in Januarie 2016. Sy het later uit die landdrosamp bedank.


Kommentaar
Republikein
Geen kommentaar is op hierdie artikel gelaat nie