Oudgevangene eis miljoene

’n Voormalige inwoner van die Windhoek Sentrale Gevangenis eis N$3 miljoen van die veiligheidsministerie en Namibiese Korrektiewe Dienste (NCS) vir sy beweerde aanranding terwyl hy in 2020 daar in aanhouding was.

Laurnentius Skeyer beweer beamptes het hom op 17 Mei 2020 in sy gesig, maag en privaat dele geskop en geslaan. Hy is glo daarna na ’n ander sel geneem waar hy ’n aand sonder ’n matras, beddegoed of toiletware moes deurbring.

Die respondente ontken die beweerde aanranding en stel in hul pleitstukke dat beamptes op daardie dag die gevangenes se selle vir verbode items deursoek het. Die beamptes het glo ’n selfoon in Skeyer se besit gevind.

“Die eiser is weens sy aanhoudende weerstand en obstruksie, asook die aanhitsing van ander gevangenes om die soektog te belemmer, na ’n ander sel geneem om daar te oornag. Sy beddegoed, matras en toiletware is aan hom voorsien.”

Die respondente sluit in die destydse minister van immigrasie, binnelandse sake, veiligheid en sekuriteit, Frans Kapofi, en die direkteur-generaal van NCS, Raphael Hamunyela, asook 11 NSC-beamptes by die Windhoek Sentrale Gevangenis.

Partye het Woensdag voor regter Dinnah Usiku in die hoërhof in Windhoek verskyn.

EERS DRIE EISERS

Drie gevangenes het aanvanklik die saak aanhangig gemaak en al drie het beweer dat beamptes van die korrektiewe dienste hom aangerand het.

Een het selfs beweer dat een van die beamptes op sy kop gespring en hy weke daarna nog bloed opgebring het.

Die ander gevangenes wat saam met Skeyer die saak aanhangig gemaak het, is Reinhardt Tjitandi, wat intussen vrygelaat is en nie meer die verrigtinge bywoon nie, en Derick Joel, wat intussen dood is.

Tjitandi het beweer dat hy op 18 Mei 2020 in die Windhoek Sentrale Gevangenis aangerand is en beamptes hom met knuppels en ’n ysterpyp geslaan het. Hy was glo ná die voorval by die gevangenis se interne dokter behandel en het na bewering steke bo sy regteroog gekry.

Joel het in die eisbesonderhede aangevoer dat een van die beamptes hom opgetel en op die grond neergegooi het en dat hy oral oor sy liggaam geskop en geslaan is. Hy het beweer die interne dokter het pynmedikasie aan hom voorgeskryf.

Tjitandi se bewerings is intussen van die eisbesonderhede geskrap en die hof het geen duidelikheid oor of die eksekuteur van Joel se boedel met die eise wil voortgaan nie.

Joel se doodsertifikaat is op 22 Junie 2022 by die hof ingedien en die oorsaak van sy dood is nie daarop aangedui nie.

VERRIGTINGE

Sedert die drie gevangenes in Junie 2020 die saak aanhangig gemaak het, is die saak al drie maal van die rol geskrap en weer teruggebring. Die rede waarom die saak van die rol geskrap is, is omdat die eisers een keer nie vir verrigtinge opgedaag het nie en die ander twee kere was weens die eisers se versuim om hofreëls na te kom.

Die mees onlangse verrigtinge fokus op die respondente se aansoek om kondonasie omdat hulle nie binne die voorgeskrewe tydperk hulle pleitstukke by die hof ingedien het nie. Skeyer staan die aansoek teen.

Die respondente moes ook vir ’n tweede maal ’n aansoek om kondonasie indien omdat hulle nie betyds hul hoofbetoë ingedien het nie. Skeyer het nie dié aansoek teengestaan nie.

Met die volgende hofverskyning sal verhoordatums geskeduleer word vir die aanhoor van argumente met betrekking tot die respondente se aansoek om kondonasie wat teengestaan word.

– [email protected]