NSFAF-hoof se ontslag finaal ná ses jaar

Ná ’n skorsing, afdanking en ’n lang uitgerekte hofstryd is die voormalige uitvoerende hoof van die Finansiële Hulpfonds vir Namibiese Studente (NSFAF) haar pos finaal kwyt.NSFAF het Vrydag in die hooggeregshof geseëvier in sy kruisappèl rakende Hilya Nghiwete se afdanking, heraanstelling en vergoeding.Sy was in diens van die NSFAF as sy uitvoerende hoof vanaf Maart 2013 tot Februarie 2020. Sy is in April 2018 geskors met volle betaling hangende ’n ondersoek en dissiplinêre verhoor na beweerde wangedrag.NSFAF se raad het Nghiwete in 2020 afgedank ondanks die feit dat die ondersoek na haar gedrag en dissiplinêre verhoor nie afgehandel was nie, met die fonds se verteenwoordigers wat beweer het dat Nghiwete die ondersoek en verhoor vertraag het.Sy het die arbeidskommissaris se hulp ingeroep en daar is toe besluit dat sy onregmatig en onbillik ontslaan is en dat sy heraangestel moet word.NSFAF het daarna ’n appèlaansoek in die arbeidshof aanhangig gemaak waar daar grootliks in Nghiwete se guns beslis is. Die arbeidshof het met die appeèl steeds bevind dat sy onregmatig afgedank is en vergoeding moet ontvang, maar NSFAF hoef haar nie weer in dieselfde pos aan te stel nie.Nghiwete het in die hooggeregshof geappelleer teen die arbeidshof te beslissing oor haar heraanstelling. NSFAF het toe ’n kruisappèl in die hooggeregshof ingedien teen die beslissing dat Nghiwete onregmatig afgedank is en die fonds vir haar vergoeding moet betaal.Regters Petrus Damaseb, Dave Smuts en Hannelie Prinsloo het die fonds se kruisappèl toegestaan en Nghiwete se appèlaansoek van die hand gewys.Die regters het in hul aansoek die bevel dat NSFAF vir Nghiwete haar gewone vergoeding vir die tydperk vanaf Februarie 2020 tot Julie 2021 moet betaal, tersyde gestel. Die hof het verder bevind dat Nghiwete regverdig afgedank is.“Die verbrokkeling van die verhouding tussen die partye is ’n geldige en regverdige rede vir die afdanking en dit maak die ontslag subjektief billik,” lui die uitspraak.Die hooggeregshof het ook beveel dat Nghiwete NSFAF se regskoste vir die appèlaansoek moet dek.Een van NSFAF se regsverteenwoordigers, Karin Klazen, verduidelik: “Hierdie saak is ’n belangrike presedent vir die beginsel dat die plig om ’n dissiplinêre ondersoek te hou, in sekere omstandighede, nie ’n absolute vereiste is nie.”– irene-mari@nmh-hub.com.na

NSFAF-hoof se ontslag finaal ná ses jaar

Kommentaar

Republikein 2026-03-20

Meld asseblief aan om kommentaar te lewer

NSFAF-hoof se ontslag finaal ná ses jaar

Kommentaar

Republikein 2026-03-20

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.