Noa se borgaansoek uitgestel

Die formele aansoek om borgtog van die Onandjokwe-dokter Dennis Iipumbu Noa is tot September uitgestel nadat sy verdedigingspan meer tyd versoek het om die saak voor te berei.

Noa het gister in die Ondangwa-landdroshof voor landdros Nelao Ya France verskyn, waar die saak vir ’n formele borgtogaansoek uitgestel is.

Sy regsverteenwoordiger, Biance Boois, het aan die hof gesê dat sy die saak eers onlangs oorgeneem het en nog nie die geleentheid gehad het om instruksies van haar kliënt te kry nie, wat dit onmoontlik maak om met die aansoek voort te gaan. Ya France het beveel dat Noa in aanhouding bly hangende die formele borgtogaansoek in September.

Noa (31) word daarvan beskuldig dat hy na bewering ’n 26-jarige man meer as ’n week gelede in sy woonstel in die Onandjokwe-hospitaal verkrag het. – [email protected]