Nampol, NDF moet opdok oor slagter se dood

Die familie van Joseph Kautjingu Ndondji is ná ’n lang regstryd wat spruit uit sy tragiese dood tydens ’n polisie- en militêre operasie in Rundu in Maart 2023, ’n skikking van N$1,3 miljoen toegeken. Ndondji, ’n 34-jarige slagter, is in sy maag deur lede van die polisiemag en die weermag geskiet wat geglo het dat hy in die besit van ’n ietermagô-vel was. Die ministerie van binnelandse sake, immigrasie, veiligheid en sekuriteit, die Namibiese polisie en die ministerie van verdediging en veteranesake moet elk N$433 300 opdok om gesamentlik die totaal van N$1,3 miljoen te betaal. Die geld sal vergoeding wees vir Ndondji se ouers, Satjingo Antonio and Kanyana Linda, sowel as sy sewe minderjarige kinders, wat ’n bron van finansiële en emosionele ondersteuning verloor het. Volgens die besonderhede van die aansoek was Ndondji die primêre broodwinner vir sy bejaarde ouers en het na verwagting N$2 000 per maand vir hulle gegee. Sy ouers wat albei pensioenarisse is, was van hom afhanklik en het geen ander bron van inkomste gehad nie. In die aansoek wat deur die eksekuteur van Ndondji se boedel, Anton Maria, gebring is, het die aansoekers gevra vir N$300 000 vir die verlies aan ondersteuning van sy ouers, N$1 miljoen vir skok, pyn en lyding en N$2 miljoen vir die verlies van ondersteuning aan sy kinders. Ten spyte van oorspronklike pogings om die saak vriendskaplik af te handel, het die regering versuim om te reageer, wat die familie aangespoor het om regsaksie in te stel. Die skikking maak ook voorsiening vir regskostes, wat van die regering vereis word om binne 90 dae te betaal. Familielede en lede van die gemeenskap in Rundu het ’n optog gehou en gevra vir aanspreeklikheid en antwoorde oor die omstandighede rondom sy sterfte. Hulle het bevraagteken hoekom niemand in hegtenis geneem is nie en gesê dat hulle glo Ndondji is deur die polisie doodgemaak.Volgens die gemeenskap is Ndondji vroeër in die nag van 3 Maart 2023 in besit van 'n ietermagô se vel gevind, en is deur die polisie opgelaai terwyl hy vleis by die Sauyema-nedersetting verkoop het. Later is gesien hoe hy in dieselfde polisievoertuig rondry en sy oom by die Mile 20-nedersetting besoek het. Hy is die laaste keer omstreeks 08:00 by die Wimpy-vulstasie gesien waar hy steeds in die polisievoertuig was. ’n Uur later is die familie ingelig dat Ndondji doodgeskiet is.Die familie het verskeie onbeantwoorde vrae oor die voorval gehad. Hulle het geëis om te weet hoe Ndondji, wat vir die ure voor sy dood in polisieaanhouding was, met die ietermagô-vel gevind kon word. As hy dit wel gedra het, hoekom het die konstabel wat by hom was dit nie afgevat nie? Daarbenewens het hulle die omstandighede van sy dood bevraagteken, insluitend hoekom hy in die bolyf in plaas van die bene geskiet is, en of hy werklik probeer ontsnap het. - republikein@republikein.com.na

Nampol, NDF moet opdok oor slagter se dood

Kommentaar

Republikein 2025-11-03

Meld asseblief aan om kommentaar te lewer

Nampol, NDF moet opdok oor slagter se dood

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.