Myn se aansoek teen Erfenisraad afgekeur

Die hoërhof in Windhoek het onlangs uitspraak gelewer in die saak wat Ekungungu, ’n steengroefmyn, teen die Nasionale Erfenisraad van Namibië aanhangig gemaak het Dit nadat die Erfenisraad ondersoek ingestel en bevind het dat Ekungungu se mynbedrywighede in die Otjohorongo-granietheuwels en Farm Gross Okandjou glo dié argeologiese erfenisterrein beskadig het.Ekungungu het in Maart 2021 die hof genader en versoek dat die raad se besluit om ’n gesamentlike argeologiese studie by Otjohorongo en Farm Gross Okandjou te onderneem, tersyde gestel moet word, asook sekere besluite wat die raad op grond van die ondersoek geneem het.Regter Marlene Tommasi het verlede week Ekungungu se aansoek met koste van die hand gewys.TERUGTREK VAN LISENSIEEkungungu het tydens die verhoor aangevoer daar is ná die studie – wat in Februarie 2020 plaasgevind het – ’n vergadering gehou waartydens die Erfenisraad na bewering besluit het dat al die omgewingsklaringsertifikate (ECC’s) en mynlisensies vir daardie gebied teruggetrek moet word. Ekungungu beweer die ernstige nadelige bevindings wat uit die studie voortspruit, is uitgevoer sonder dat hulle die geleentheid gegun is om hulle kant van die saak te stel en vertoë te rig.Die raad het aangevoer geen finale besluite is geneem nie, maar daar is besluit dat die raadsvoorsitter die ministerie moet versoek om die ECC’s terug te trek.“Die besluit om die mynlisensie en die ECC terug te trek of te kanselleer word deur die onderskeie ministeries geneem en nie die eerste en tweede respondent [voorsitter, erfenisraad] nie.”Volgens die uitspraak is geen bewyse gelewer dat die ministerie van mynbou en energie ’n finale besluit geneem het ten opsigte van die lisensie of ECC toe die aansoek gebring is nie.UITSPRAAK“Ek is van mening die besluit om met die argeologiese ondersoek te begin sowel as die besluit om ander terreine onder ’n voorlopige beskermingsbevel te plaas, voorlopige stappe was en nie finaal is nie. Die aansoek om hersiening is dus voortydig,” lui Tommasi se uitspraak.Tommasi het verder daarop gewys die Erfenisraad het nie die statutêre mag om die lisensie en ECC terug te trek nie.AGTERGRONDRepublikein het op 24 Maart 2020 in ’n berig onthul dat die raad onderneem het om die impak van die mynbedrywighede by Otjohorongo-granietheuwels en Farm Gross Okandjou op die argeologiese hulpbronne in daardie gebied te ondersoek.Volgens die verslag waarop die berig gebaseer was, het die mynbedrywighede die argeologiese erfenisterrein beïnvloed en reeds permanente skade en verlies van argeologiese hulpbronne veroorsaak.Die studie is uitgevoer nadat lede van die Otjohorongo-gemeenskap en die eienaar van Farm Gross Okandjou die raad genader het met klagte van sistematiese versteurings en moontlike skade aan ’n argeologiese erfenislandskap as gevolg van dié bedrywighede.Volgens die raad is daar 27 argeologiese terreine in die betrokke gebied met meer as 523 prehistoriese rotskunswerke in en om die gebied wat deur Ekungungu se mynlisensie gedek word. Aandeelhouers het glo sowat N$50 miljoen in Ekungungu belê. – kristien@republikein.com.na

Myn se aansoek teen Erfenisraad afgekeur

Kommentaar

Republikein 2025-11-04

Meld asseblief aan om kommentaar te lewer

Myn se aansoek teen Erfenisraad afgekeur

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.