Moordenaars 30 jaar tronk toe

Die hoërhof in Windhoek het twee mans tot lang tronkstraf gevonnis vir die wrede moord, verkragting en rooftog wat tydens ’n aanval op Outjo 12 jaar gelede gepleeg is.Regter Nate Ndauendapo het Lourense Aib en Hendrik !Nowoseb tot 30 jaar gevangenisstraf vir moord gevonnis, met bykomende vonnisse vir poging tot moord, verkragting en roof met verswarende omstandighede.Die vonnisse op die oorblywende aanklagte sal samelopend met die moordvonnis van 30 jaar uitgedien word.Die twee is in September 2025 op vier aanklagte skuldig bevind, insluitend moord, poging tot moord, verkragting volgens die Wet op die Bekamping van Verkragting 8 van 2000 en roof met verswarende omstandighede.Die skuldigbevindings spruit uit ’n voorval op 25 Oktober 2014 toe Aib, !Nowoseb en medebeskuldigde Ferdinand Hangula met geweld ’n snoepiewinkel by die huis van die 71-jarige Gerhardus Koekemoer ingebreek het.Tydens die aanval het hulle ’n vrou op die perseel aangerand en verkrag. Koekemoer, wat gereageer het nadat hy die rumoer gehoor het, is met ’n mes doodgesteek voordat hy kon ingryp. Die trio het van die toneel gevlug met onder meer gesteelde kontant van N$250, Tango-herlaaikaarte ter waarde van N$465, lekkergoed en sigarette. Hangula is intussen tydens die verhoor oorlede.By die vonnisoplegging van Aib en !Nowoseb het die hof bevind dat die persoonlike omstandighede van die beskuldigdes min gewig dra wanneer dit teen die erns van die misdrywe en die belange van die samelewing opgeweeg word.GEEN BEROUNdauendapo het gesê die misdade is gekenmerk deur geweld, wreedheid en ’n minagting vir menselewens en waardigheid. Die regter het bygevoeg dat geeneen van die beskuldigdes opregte berou getoon het nie.Die hof het ook die moordenaars se misdaadgeskiedenisse in ag geneem, insluitend skuldigbevindings vir oortredings wat ná die voorval gepleeg is, maar voor vonnisoplegging afgehandel is en bevind dit is relevant om hul karakter en geneigdheid om die wet te oortree, te beoordeel.!Nowoseb dien tans tronkstraf van 44 jaar uit nadat hy in Augustus 2017 in die hoërhof in Windhoek gevonnis is op aanklagte van moord en poging tot moord.Hy is skuldig bevind aan die moord op sy meisie op 7 Desember 2014 deur haar herhaaldelik met ’n mes te steek terwyl sy in ’n hospitaal in Outjo behandel is nadat hy haar die vorige aand met ’n mes gesteek het.Aib dien ook tronkstraf van 14 jaar uit op ’n aanklag van huisbraak met die opset om te steel en diefstal. Hy is in November 2019 gevonnis.Ndauendapo het verder grondwetlike besware oor buitensporig lang vonnisse oorweeg, maar uiteindelik beslis dat die erns van die misdrywe ’n swaar straf regverdig.Albei beskuldigdes is tot 30 jaar vir moord, 15 jaar vir poging tot moord, 20 jaar vir verkragting en 15 jaar vir roof met verswarende omstandighede gevonnis.Die vonnisse op aanklagte twee tot vier sal egter samelopend met die moordvonnis van 30 jaar uitgedien word.Die hof het die noodsaaklikheid van die vonnisse as afskrikmiddel beklemtoon in die lig van die hoë voorkoms van gewelddadige misdaad en verklaar dat die belange van die samelewing swaarder weeg as die persoonlike omstandighede van die oortreders.Adjunk-aanklaer-generaal Karin Esterhuizen het tydens die verhoor vir die staat opgetree.Regsverteenwoordigers Jermaine Muchali het vir Aib en Natji Tjirera vir !Nowoseb verteenwoordig.– rita@nmh-hub.com.na

Moordenaars 30 jaar tronk toe

Kommentaar

Republikein 2026-09-09

Meld asseblief aan om kommentaar te lewer

Moordenaars 30 jaar tronk toe

Kommentaar

Republikein 2026-09-09

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.