Moordenaar wil wéér teen vonnis appelleer
Aansoek om verlof tot appèl hangend
'n Man wat in 2019 sy meisie vermoor het, poog om in die hooggeregshof teen sy vonnis van 18 jaar te appelleer.
’n Veroordeelde moordenaar wat tans by die Hardap korrektiewe dienste op Mariental in aanhouding is, poog om in die hooggeregshof teen sy vonnisoplegging te appelleer nadat sy vorige appèlaansoek in die hoërhof misluk het.
Derick Januarie is vier jaar gelede skuldig bevind aan die moord op sy meisie wat hy tydens ’n woede-uitbarsting met ’n mes doodgesteek het.
Die aansoek om verlof tot appèl om teen die saak in die hooggeregshof te appelleer, is Maandag deur regters Dinah Usiku en Claudia Claasen in die hoërhof in Windhoek aangehoor.
AGTERGROND
Januarie is op 6 Junie 2019 in Rehoboth se streekhof tot 18 jaar tronkstraf gevonnis vir die moord op sy meisie wat hy op 1 Januarie 2019 op ’n plaas in die Nauchas-omgewing vermoor het.
Volgens Januarie se getuienis en pleitverduideliking het die oorledene hom met ’n ander man verneuk. Hy is op 1 Januarie 2019 na haar huis om haar daaroor uit te vra, maar sy wou nie met hom praat nie.
’n Ooggetuie het gesien hoe Januarie die oorledene teen die muur en op die grond vasdruk en oor haar staan. Januarie het daarna opgestaan en weggehardloop. Volgens die getuie het die oorledene ook opgestaan en na buite gehardloop terwyl sy om hulp geroep het.
Volgens die ooggetuie het sy neergeval en toe sien sy die bloed wat by haar nek uitvloei.
Die nadoodse ondersoek het bepaal dat die oorledene een keer met ’n mes in die bors en een keer in die nek gesteek is en dit het tot haar dood gelei.
Januarie se verweer was dat hy in ’n toestand van niepatologiese outomatisme opgetree het.
“Die oorledene was my meisie. Ek het uitgevind sy was ontrou en dat sy my nie meer wou sien nie. Ek het ’n breinfloute gehad en eers die volgende dag tot my sinne gekom. Ek kan nie onthou wat gebeur het nie.”
“Ek pleit onskuldig omdat ek geen beheer oor my optrede gehad het nie. Ek kon nie onderskei tussen reg en verkeerd nie. Dit was nie my bedoeling om haar dood te maak nie,” lui Januarie se pleitverduideliking.
Die staat het aangevoer Januarie het reeds voor die aanval van haar beweerde ontrouheid geweet en dat hy daarom nie so emosioneel oorweldig kon wees as hy reeds bewus daarvan was nie.
APPÈLAANSOEK BY HOËRHOF
Die huidige aansoek om verlof tot appèl volg ná Januarie ’n appèlaansoek teen sy vonnisoplegging en skuldigbevinding in die hoërhof in Windhoek gebring het.
Daardie aansoek het misluk en daarom doen hy nou aansoek om verlof tot appèl om die uitspraak in die hooggeregshof uit te daag.
Januarie beweer die landdros wat hom in 2019 gevonnis het, het twee foute begaan.
Landdros Alexis Diergaardt het Januarie se bewering verwerp dat hy as gevolg van sy emosionele toestand nie sy optrede kon beheer nie.
Diergaardt het ook in haar uitspraak na die getuienis van ’n sekere Willem Jansen verwys, ten spyte daarvan dat hy nooit ’n getuie in die saak was nie. Diergaardt het in ’n brief aan die hoërhof erken dat sy ’n fout begaan het.
“Dit is duidelik Diergaardt se verstand was vertroebel deur die bewyse van Jansen, wat wel nooit getuig het nie en hierdie bewyse kon haar beïnvloed het om Januarie skuldig te bevind,” lui die gronde van appèl wat by die hoërhof ingedien is.
Regters Christie Liebenberg en Orben Sibeya het op 6 September 2019 die appèlaansoek van die hand gewys.
Hulle het bevind dat Januarie se bewering van niepatologiese outomatisme nie geslaag het nie, omdat daar nie voldoende bewyse ter ondersteuning daarvan was nie.
Liebenberg en Sibeya het verder bevind dat hoewel daar onregmatighede in die uitspraak was in terme van die landdros se verwysing na ’n getuie wat nie in die saak getuig het nie, het dit geen fundamentele invloed op die meriete van die saak of die uitspraak gehad nie.
Dit het verder die erns van die oortreding beklemtoon omdat huishoudelike geweld ’n ernstige probleem in ons land geword het en howe strawwer vonnisse met betrekking daartoe sal oplê in ’n poging om soortgelyke misdrywe te bekamp.
Liebenberg en Sibeya het daarom bevind dat die vonnis gepas was en die landdros geen foute in die vonnisoplegging begaan het nie.
– [email protected]
Derick Januarie is vier jaar gelede skuldig bevind aan die moord op sy meisie wat hy tydens ’n woede-uitbarsting met ’n mes doodgesteek het.
Die aansoek om verlof tot appèl om teen die saak in die hooggeregshof te appelleer, is Maandag deur regters Dinah Usiku en Claudia Claasen in die hoërhof in Windhoek aangehoor.
AGTERGROND
Januarie is op 6 Junie 2019 in Rehoboth se streekhof tot 18 jaar tronkstraf gevonnis vir die moord op sy meisie wat hy op 1 Januarie 2019 op ’n plaas in die Nauchas-omgewing vermoor het.
Volgens Januarie se getuienis en pleitverduideliking het die oorledene hom met ’n ander man verneuk. Hy is op 1 Januarie 2019 na haar huis om haar daaroor uit te vra, maar sy wou nie met hom praat nie.
’n Ooggetuie het gesien hoe Januarie die oorledene teen die muur en op die grond vasdruk en oor haar staan. Januarie het daarna opgestaan en weggehardloop. Volgens die getuie het die oorledene ook opgestaan en na buite gehardloop terwyl sy om hulp geroep het.
Volgens die ooggetuie het sy neergeval en toe sien sy die bloed wat by haar nek uitvloei.
Die nadoodse ondersoek het bepaal dat die oorledene een keer met ’n mes in die bors en een keer in die nek gesteek is en dit het tot haar dood gelei.
Januarie se verweer was dat hy in ’n toestand van niepatologiese outomatisme opgetree het.
“Die oorledene was my meisie. Ek het uitgevind sy was ontrou en dat sy my nie meer wou sien nie. Ek het ’n breinfloute gehad en eers die volgende dag tot my sinne gekom. Ek kan nie onthou wat gebeur het nie.”
“Ek pleit onskuldig omdat ek geen beheer oor my optrede gehad het nie. Ek kon nie onderskei tussen reg en verkeerd nie. Dit was nie my bedoeling om haar dood te maak nie,” lui Januarie se pleitverduideliking.
Die staat het aangevoer Januarie het reeds voor die aanval van haar beweerde ontrouheid geweet en dat hy daarom nie so emosioneel oorweldig kon wees as hy reeds bewus daarvan was nie.
APPÈLAANSOEK BY HOËRHOF
Die huidige aansoek om verlof tot appèl volg ná Januarie ’n appèlaansoek teen sy vonnisoplegging en skuldigbevinding in die hoërhof in Windhoek gebring het.
Daardie aansoek het misluk en daarom doen hy nou aansoek om verlof tot appèl om die uitspraak in die hooggeregshof uit te daag.
Januarie beweer die landdros wat hom in 2019 gevonnis het, het twee foute begaan.
Landdros Alexis Diergaardt het Januarie se bewering verwerp dat hy as gevolg van sy emosionele toestand nie sy optrede kon beheer nie.
Diergaardt het ook in haar uitspraak na die getuienis van ’n sekere Willem Jansen verwys, ten spyte daarvan dat hy nooit ’n getuie in die saak was nie. Diergaardt het in ’n brief aan die hoërhof erken dat sy ’n fout begaan het.
“Dit is duidelik Diergaardt se verstand was vertroebel deur die bewyse van Jansen, wat wel nooit getuig het nie en hierdie bewyse kon haar beïnvloed het om Januarie skuldig te bevind,” lui die gronde van appèl wat by die hoërhof ingedien is.
Regters Christie Liebenberg en Orben Sibeya het op 6 September 2019 die appèlaansoek van die hand gewys.
Hulle het bevind dat Januarie se bewering van niepatologiese outomatisme nie geslaag het nie, omdat daar nie voldoende bewyse ter ondersteuning daarvan was nie.
Liebenberg en Sibeya het verder bevind dat hoewel daar onregmatighede in die uitspraak was in terme van die landdros se verwysing na ’n getuie wat nie in die saak getuig het nie, het dit geen fundamentele invloed op die meriete van die saak of die uitspraak gehad nie.
Dit het verder die erns van die oortreding beklemtoon omdat huishoudelike geweld ’n ernstige probleem in ons land geword het en howe strawwer vonnisse met betrekking daartoe sal oplê in ’n poging om soortgelyke misdrywe te bekamp.
Liebenberg en Sibeya het daarom bevind dat die vonnis gepas was en die landdros geen foute in die vonnisoplegging begaan het nie.
– [email protected]
Kommentaar
Republikein
Geen kommentaar is op hierdie artikel gelaat nie