Moordbeskuldigde erken aanval was ‘barbaars’

Die staat het gister beweer die moordbeskuldigde Abner Matheus het ’n reeks “desperate pogings aangewend om homself te bevry” van ’n bedrogsaak nadat die beheeraanklaer van Ondangwa, Justine Shiweda, sy aansoek om borgtog teengestaan het. Matheus word as die beweerde meesterbrein agter ’n aanval op Shiweda beskou wat maande later aan haar beserings beswyk het.Tydens die borgtogverhoor van sy neef, Petrus Shikwaya, in die Ondangwa-landdroshof, het staatsaanklaer Yeukai Kangira aangevoer Matheus het eers probeer om die klaer in ’n bedrogsaak teen hom te kry om die klag terug te trek. In die saak word hy daarvan beskuldig dat hy ’n pensioenaris uit N$70 000 bedrieg het.Toe dit na bewering misluk het, het Matheus volgens die staat glo beplan om die saakdossier te steel. Hy sou later glo ook oorweeg het om die Ondangwa-landdroshof af te brand.Volgens Kangira het Matheus na bewering verskeie individue, insluitend Shikwaya, gewerf om Shiweda te vermoor, wat sy vrylating op borgtog teengestaan het, toe dit misluk het.Die staat voer aan Matheus se bedrogsaak was geskeduleer om drie dae nadat Shiweda op 17 Oktober 2025 aangeval is, weer in die hof aangehoor te word. Matheus het in reaksie op die bewerings enige betrokkenheid by ’n komplot teen die oorlede beheeraanklaer ontken.“Die staat praat asof hulle seker is ek het dit gedoen. Ek het gesê ek is nie by die saak betrokke nie,” het hy aan die hof gesê.“Ek is nie betrokke by enige moord of die voorneme om enigiemand te vermoor nie.” Matheus het ook ontken dat hy voordeel uit Shiweda se dood sou trek.“Ek sou nie voordeel uit Justine se dood trek nie. Ek het hof toe gekom vir ’n verhoordatum. Ek was gereed om my onskuld te bewys,” het hy getuig.Die hof het gehoor hoe Shiweda verlede Oktober in die teenwoordigheid van haar kinders aangeval is, voordat sy later in Februarie vanjaar aan haar beserings dood is.Matheus het die aanval as “barbaars” beskryf.“Ek erken die manier waarop Justine aangeval is, is barbaars. Ek wat self ’n ouer is, sou nie wens dat enige kind dit moes aanskou nie,” het hy gesê.Toe Kangira aan hom sê dat Shiweda weens die aanval op haar gesterf het, was Matheus se antwoord: “Mag haar siel in vrede rus.”Matheus ontken die staat se bewerings dat hy die meesterbrein agter die aanval en moord op Shiweda was. Die borgtogverhoor duur vandag voor landdros Kaeren Kleopas voort. Matheus word deur Murray Shikongo verteenwoordig. – tuyeimo@nmh-hub.com.na

Moordbeskuldigde erken aanval was ‘barbaars’

Kommentaar

Republikein 2026-06-18

Meld asseblief aan om kommentaar te lewer

Moordbeskuldigde erken aanval was ‘barbaars’

Kommentaar

Republikein 2026-06-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.