Menzies suksesvol in wysigingsaansoek

Die maatskappy wat die afgelope nege jaar die grondhanteringsdienste by die Internasionale Lughawe Hosea Kutako (HKIA) lewer, Menzies Aviation Namibia, het Dinsdag ’n klein oorwinning in sy saak teen die Namibië Lughawensmaatskappy (NAC) behaal.Die hoërhof in Windhoek het Menzies se aansoek toegestaan om sy aanvanklike beëdigde verklaring te wysig of ’n aanvullende beëdigde verklaring in te dien.Dit kom nadat Menzies beweer het dat nuwe inligting aan die lig gekom het wat die akkuraatheid van die tenderaansoeke en die geldigheid van die tendertoekenning van grondhanteringsdienste by HKIA aan Paragon Investment Holdings in twyfel trek.Menzies beweer NAC het drie verskillende weergawes van die tenderaansoek by die hof ingedien. Nadat NAC die dokumente ingedien het, het Menzies ’n handskrifkenner, Yvette Palm, gekry om die dokumente te ontleed. Sy het tot die gevolgtrekking gekom dat die dokument wat die NAC as die oorspronklike tenderaansoek geïdentifiseer het, glo verskeie afwykings en tekortkominge bevat.Ingevolge die onlangse hofbevel deur die voorsittende regter Eileen Rakow, sal Menzies nou die geleentheid gegun word om hierdie nuwe inligting en die bevindinge van Palm se ondersoek by sy aanvanklike hofstukke by te werk.“Die kwessie wat die applikant [Menzies] geopper het, kom inderdaad neer op spesiale omstandighede aangesien dit verband hou met die hofrekord wat op sy beurt die grondslag van die hersieningsaansoek uitmaak. Aangesien die bewerings gemaak word dat die bod nie behoorlik voltooi is nie en dit voltooi is nadat die aanvanklike rekord ingedien is, verg dit inderdaad ’n antwoord van die respondente. Die bewerings is van so ’n aard dat dit die kern van die saak kan beïnvloed,” het Rakow in haar uitspraak gesê.Menzies het nog ’n aansoek gebring wat die hof versoek om NAC te verplig om die maatskappy toe te laat om die grondhanteringsdienste by HKIA voort te sit totdat die hersieningsproses voltooi is. Rakow het dié aansoek van die hand gewys. Die saak is tot 6 Junie uitgestel.AGTERGRONDDie NAC het in Junie verlede jaar ’n dringende aansoek by die hoërhof in Windhoek aanhangig gemaak vir ’n hofbevel wat Menzies verplig om die lughawe se perseel te ontruim. Die basis vir die aansoek was dat Menzies se kontrak om die grondhanteringsdienste by HKIA te lewer, op 30 Junie 2022 verval het en Paragon moes op 1 Julie dié dienste oorneem. Menzies het ’n teenaansoek ingedien wat beweer die tender is onregmatig aan Paragon toegeken.Die hof het in NAC se guns beslis en ’n hofbevel is uitgereik vir Menzies om die perseel te verlaat en dat Paragon die dienste moet oorneem. Menzies het teen die uitspraak in die hooggeregshof geappelleer en die appèl is steeds hangend. Menzies is tans steeds in beheer van grondhanteringsdiente by HKIA. – kristien@republikein.com.na

Menzies suksesvol in wysigingsaansoek

Kommentaar

Republikein 2025-06-17

Meld asseblief aan om kommentaar te lewer

Menzies suksesvol in wysigingsaansoek

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie