Madisia kon glo nie gebeure voorspel

Regter Christie Liebenberg het gister in die hoërhof in Windhoek finale betoë in die Wasserfall-moordsaak aangehoor. Sibbe Azaan Madisia en Steven Mulundu staan gesamentlik tereg op klagte van moord, roof en regsverydeling. Madisia staar bykomend twee klagte van bedrog in die gesig. Die staatsaanklaer Henry Muhongo het aan die hof gesê Madisia kan nie steun op selfverdediging as ’n argument nie, weens haar getuienis voor die hof dat sy vir wyle Shanon Wasserfall tot in die slaapkamer gevolg het. “Haar bewering dat sy aangeval is, kan nie waar wees nie omdat sy haar beweerde aanvaller gevolg het. Sy is nie aangeval nie,” het hy gesê.Madisia se regsverteenwoordiger, Albert Titus, het gesê Madisia steun nie op selfverdediging nie, maar eerder op haar intensies toe sy vir Wasserfall gestoot het. “Selfs onder die bevoegde uitspraak (competent verdict) van strafbare manslag, skryf die wet voor dat ’n beskuldigde redelik kon voorsien dat die persoon kon doodgaan weens hul optrede. “Die eerste beskuldigde [Madisia] het aan die hof gesê sy kon nie voorspel dat die oorledene sou doodgaan weens haar dade nie,” het Titus gesê. Titus, asook Mulundu se regsverteenwoordiger, Tanya Klaazen, het beide gesê die staat het onvoldoende bewyse gelewer om ander moontlikhede uit te beeld wat twyfel sou skep oor Madisia se intensies om Wasserfall te vermoor.“Die staat gee klaarblyklik toe tot groot dele van die beskuldigde se weergawe van gebeure,” het Titus gesê. Muhongo het egter Madisia se getuienis in twyfel getrek ten opsigte van die verskeie weergawes wat sy gegee het. Titus het hierop geantwoord die hooggeregshof het voorheen melding gemaak van die moontlikheid dat ’n beskuldigde ’n valse weergawe van gebeure sou aflê omdat hulle glo die waarheid is nie geloofwaardig nie. Dit is die rede wat Madisia tydens haar getuienis aangevoer het met betrekking tot haar teenstrydige weergawes. Muhongo het ook aangevoer beide Madisia en Mulundu het geweet dat hulle aanspreeklik gehou kon word vir hul optrede. Dit weens die feit dat Madisia aan Mulundu gesê het dat sy iets “verkeerd” gedoen het toe sy hom gebel het om haar te help. Klaazen het hierop aangevoer dit is ’n “misleidende” argument en dat Mulundu geglo het Wasserfall se dood was ’n ongeluk. Liebenberg sal na verwagting op 16 Mei uitspraak lewer. – irene-mari@republikein.com.na

Madisia kon glo nie gebeure voorspel

Kommentaar

Republikein 2025-12-19

Meld asseblief aan om kommentaar te lewer

Madisia kon glo nie gebeure voorspel

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.