Ma geskik om verhoor te word ná ‘moord op baba’

Die voormalige polisievrou, Vapeni Boois (36), wat daarvan beskuldig word dat sy haar eenjarige babaseuntjie, Amare, in Januarie 2023 wreed vermoor het, is gister in die hoërhof in Windhoek geskik bevind om verhoor te word.Regter Philanda Christiaan het beslis Boois, wat met grenslynpersoonlikheidsteuring en maniese depressie gediagnoseer is, is strafregtelik verantwoordelik vir haar dade.Haar geestestoestand kan egter tydens vonnisoplegging oorweeg word indien sy aan moord skuldig bevind word. Die hof het Vapeni vir psigiatriese waarneming verwys nadat kommer oor haar geestestoestand tydens hofverrigtinge geopper is.Christiaan het op grond van die verslag se getuienis, bevind dat ten spyte daarvan dat Boois met die twee versteurings gediagnoseer is, sy steeds die onregmatigheid van haar optrede kon besef en daarvolgens kon optree.AGTERGRONDBoois het haar seuntjie na bewering op 12 Januarie 2023 altesaam 15 keer met ’n mes gesteek nadat sy ontdek het dat die pa van haar baba wel ’n getroude man is. Wat haar verder woedend gemaak het, volgens ’n onlangse berig in Network Media Hub (NMH), was dat die vrou van Amare se pa haar man vir sy ontrouheid vergewe het.“Sy [Boois] het ’n moeilike tyd gehad om te aanvaar dat hy getroud was. Sy het selfs stem- en WhatsApp-boodskappe aan sy vrou gestuur en haar van sy ontrouheid vertel en dat hy ’n kind by haar het. “Hy en sy vrou kon egter daarin slaag om te versoen en dit is glo wat haar wrok aangevuur het,” is in die hof getuig.Luidens die klagstaat staan Boois tereg op ’n tweede aanklag van dwarsboming van die gereg nadat sy erken het sy het Amare in ’n vlak graf begrawe om te keer dat sy liggaam ontbind.Sy het ook erken sy het hom begrawe aangesien sy hom nie kon dra toe sy na ’n ander dorp probeer vlug het nadat sy hom glo vermoor het nie.Boois het tydens vorige hofverskynings aan die hof gesê haar besluit om beide haar en haar seun se lewens te beëindig, spruit uit die begeerte om van hul lyding te ontsnap. Sy het beweer sy het geen ondersteuning van enige kant van die families ontvang nie. Sy het ook verwys na vorige ervarings, insluitend bewerings van verkragting teen die kind se pa, wat sy as ’n misdadiger en bekende bendelid beskryf het.– rita@nmh-hub.com.na

Ma geskik om verhoor te word ná ‘moord op baba’

Kommentaar

Republikein 2025-04-30

Meld asseblief aan om kommentaar te lewer

Ma geskik om verhoor te word ná ‘moord op baba’

Kommentaar

Republikein 2025-04-30

Meld asseblief aan om kommentaar te lewer

MELD AAN

Advertensie