Kind glo blind, verlam ná mangeloperasie

Die Windhoekse hoërhof verhoor ’n saak van mediese nalatigheid met ’n eis van N$17 miljoen deur die ma van ’n vierjarige meisie wat na bewering blind, verlam en met breinskade gelaat is ná ’n mangel- en adenoïed-operasie by die Windhoek Sentrale Hospitaal in Desember 2024.

Hofstukke voer aan die operasie is deur ’n algemene praktisyn in die afwesigheid van die aangewese oor-, neus- en keelspesialis uitgevoer en dat mediese personeel nalatig versuim het om komplikasies en ’n hartstilstand tydens en ná die prosedure behoorlik te hanteer.

Die ministerie van gesondheid en maatskaplike dienste betwis egter die bewerings en stel in hofstukke dat dit nie ongewoon is dat ’n ervare mediese praktisyn met toepaslike ervaring en indiensopleiding so ’n operasie uitvoer in oorleg met en onder toesig van ’n spesialis nie.

In hierdie geval, sê die ministerie, was die spesialis naby en in ’n posisie om in te gryp indien nodig.

Volgens die eisbesonderhede is die kind – gebore in September 2022 – in die hospitaal opgeneem vir voorbereiding voordat sy op of omstreeks 2 Desember 2024 geopereer is.

Die eiser, wat as die kind se wettige voog optree, sê die hospitaal het onderneem om te verseker dat die prosedure met behoorlike vaardigheid, sorg en toesig uitgevoer sou word en dat die kind se veiligheid deurgaans die primêre oorweging sou bly.

Daar word verder beweer dat verskeie mislukkings tydens die prosedure voorgekom het, insluitend onvoldoende risiko-assessering voor die operasie, swak noodreaksie tydens komplikasies en vertragings in die hantering van ’n toestand ná die operasie wat in hofstukke as post-obstruktiewe pulmonale edeem beskryf word. 

Die eis dui ook op ’n beweerde vertraging om resussitasie te begin nadat die kind ’n hartstilstand gehad het.

Die eiser eis N$17 miljoen se skadevergoeding, opgedeel in mediese koste, permanente gestremdheid, verlies aan toekomstige verdienste en pyn en lyding.

Die ministerie verwerp alle bewerings van nalatigheid en hou vol dat alle assesserings en prosedures in ooreenstemming met aanvaarbare mediese standaarde en hospitaalprotokolle uitgevoer is. Dit handhaaf dat komplikasies van hierdie aard bekende risiko’s by oor-neus-en keelprosedures is en dat daar geen oorsaaklike verband tussen die operasie en die kind se huidige toestand is nie.

– [email protected]