Kennedy misluk in saak oor ‘slagoffers’ se getuienis

Die voormalige landdros Jaco Kennedy, wat op drie aanklagte van verkragting teregstaan, het misluk in sy poging om die hof te oortuig om sy slagoffers in sy teenwoordigheid te laat getuig.Dit nadat regter Kobus Miller in April 2021 beveel het dat twee vroue in ’n aparte kamer in die hof via geslotekringtelevisie (CCTV) in Kennedy se verhoor kan getuig. Hy was ontevrede met dié bevel.Kennedy het in Junie 2022 ’n saak by die hoërhof in Windhoek aanhangig gemaak om die grondwetlikheid van die bepalings van die strafproseswet (CPA) wat hiervoor voorsiening maak, uit te daag. Die hofaansoek wat teen die aanklaer-generaal, die prokureur-generaal en die minister van justisie aanhangig gemaak is, is Vrydag van die hand gewys.GRONDWETLIKHEIDDie betrokke bepalings van die CPA stipuleer dat spesiale reëlings getref kan word om kwesbare getuies in omstandighede te laat getuig om te verseker dat hulle volle en duidelike getuienis lewer. Kwesbare getuies sluit onder meer minderjariges in, asook diegene waarteen seksuele of onsedelike misdrywe gepleeg is.Kennedy het aangevoer dat dié bepalings inbreuk maak op sy grondwetlike regte op ’n regverdige verhoor en die aanname dat hy onskuldig is tot hy skuldig bevind word.Hy het verder beweer dat die bepalings glo nie voorsiening maak vir enige regulatoriese raamwerk nie en dat daar ’n gebrek is aan enige riglyne en beperkings vir die omstandighede waaronder ’n kwesbare getuie toegelaat word om hom of haar getuienis deur CCTV af te lê. Kennedy meen dit gee die hof onbeperkte diskresie wat strydig is met sy reg op ’n regverdige verhoor.Die respondente het die aansoek teengestaan en aangevoer dat die bepalings nie ongrondwetlik is nie, maar dat Kennedy die aansoek gebruik as ’n strategie om sy verhoor te vertraag.UITSPRAAKRegters Nate Ndauendapo en Christie Liebenberg het in die uitspraak daarop gewys dat die hof verskeie faktore in ag neem wanneer ’n bevel met betrekking tot dié bepalings uitgereik word.Buiten vir die doel om volledige en duidelik getuienis in te vorder, word openbare belang, die belang van geregtigheid, die beskikbaarheid van toerusting en die welstand van die getuie ook oorweeg. Die regters het ook in hul uitspraak daarop gewys dat die wet vereis dat die beskuldigde, sy regsverteenwoordiger, die staatsaanklaer en die regter of landdros die getuie moet kan hoor en sien terwyl hy of sy getuig.“Elke betrokke persoon sal in staat wees om die getuie waar te neem en te beoordeel terwyl getuienis gelewer word. Daardie belangrike reg word behou,” lui die uitspraak.Die regters verduidelik dat hulle die teks, konteks, doel en betekenis van die woorde in die bepaling as geheel nagegaan het om tot hul beslissing te kom.“Die hof sien nie die gebrek aan duidelikheid waaroor gekla word raak nie. Daar is bevind dat die betekenis van die bepaling duidelik is.“Hierdie bepaling beperk nie die beskuldigde se reg op ’n regverdige verhoor nie en ondermyn ook nie die aanname dat hy onskuldig is soos uiteengesit in die Grondwet nie.”– kristien@nmh-hub.com.na

Kennedy misluk in saak oor ‘slagoffers’ se getuienis

Kommentaar

Republikein 2025-06-17

Meld asseblief aan om kommentaar te lewer

Kennedy misluk in saak oor ‘slagoffers’ se getuienis

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie