Karibib-boer kry ná ses jaar tien skape terug

’n Boer van die Karibib-omgewing het die ministerie van veiligheid en sekuriteit en drie konstabels van die eenheid vir veediefstal van die Namibiese polisie in 2018 hof toe gesleep omdat hulle na bewering onwettig op sy skape beslag gelê het. Die hoërhof in Windhoek het vandeesweek hieroor uitspraak gelewer.Die boer, Immanuel Engelbreg, het ook beweer die konstabels het wederregtelik, sonder sy medewete en sonder ’n lasbrief sy woning binnegegaan en beslag gelê op ’n vrieskas met ’n beeskarkas daarin. Hy het ook aangevoer sowat N$25 000 is vanuit sy klerekas in sy slaapkamer gesteel nadat polisie sy woning deursoek het.Die skape is destyds in verband met ’n ondersoek na veediefstal gekonfiskeer, maar Engelbreg sê hy is nooit gearresteer, formeel aangekla of ondervra in verband met die klagte nie.Engelbreg het geëis dat die skape aan hom terugbesorg word of dat hy alternatiewelik ten bedrae van N$52 000 vergoed word. Hy het N$15 000 geëis vir die vrieskas en N$15 000 vir die beeskarkas wat glo nooit aan hom terugbesorg is nie. Hy het ook versoek dat die N$25 000 aan hom terugbetaal word wat glo uit sy huis verdwyn het.Hoewel Engelbreg aanvanklik gesê het daar is op 52 Van Rooyen-skape beslag gelê, is tydens die verhoor vasgestel dat die konstabels op 19 Oktober 2017 net sewe skape weggeneem het en die volgende dag 14. Die sewe van die eerste dag (almal Van Rooyen-skape) is na Suid-Afrika gestuur vir DNS-toetse. Een getuie vir die verweerders het getuig die oorblywende 14 skape is na Engelbreg teruggeneem, maar ’n ander het getuig dat vier skape teruggeneem is en dat tien na Farm Bethel vir veilige bewaring verplaas is. Die sewe Van Rooyen-skape en tien ander is daarom nie meer in Engelbreg se besit nie.POLISIE Die verweerders het erken dat hulle op 21 skape beslag gelê het.“Die verweerders pleit verder dat die DNS-toetse bevestig het dat die skape waarop beslag gelê is, die nageslag was van die skape op Farm Bethel – die klaer in die veediefstalklag se plaas. Die ondersoek na hierdie saak duur voort en ’n dossier is by die aanklaer-generaal ingedien vir ’n besluit oor moontlike vervolging,” het die verweerders aangevoer.Die verweerders het beweer hulle het met ’n lasbrief beslag gelê op die vrieskas en karkas. Hulle het glo vir Engelbreg ingelig dat hy dit kan kom haal, maar hy het nie. Van die “gesteelde N$25 000” het hulle enige kennis ontken.UITSPRAAKIngevolge Prinsloo se uitspraak kan die sewe Van Rooyen-skape slegs finaal verplaas word wanneer die strafregtelike verrigtinge rakende die veediefstalklagte afgehandel is. Sy het beslis dat die diere “vir eers vir veilige bewaring by Farm Bethel bly”.“Daar is wel geen dispuut rakende die eienaarskap van die oorblywende tien skape, wat óf gemengde rasse of Damara-skape is nie. Dit is duidelik die eiser se eiendom. Daar is geen rede vir die verweerder om besit van hierdie diere te behou nie aangesien hulle nie deel van die kriminele ondersoek is nie,” lui die uitspraak.Ingevolge ’n hofbevel het Prinsloo beveel dat die verweerders tien skape aan Engelbreg terugbesorg of, indien die diere nie gelewer kan word nie, moet die verweerders ’n totaal van N$15 000 aan Engelbreg betaal.Die res van Engelbreg se eise is op grond van onvoldoende bewyse van die hand gewys.

Karibib-boer kry ná ses jaar tien skape terug

Kommentaar

Republikein 2025-05-01

Meld asseblief aan om kommentaar te lewer

Karibib-boer kry ná ses jaar tien skape terug

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie