Ingrid se klasregister vermis

Die Namibiese regering het onder eed erken die klasregister kan nie opgespoor word wat gebruik is om leerlinge se teenwoordigheid by die K.W. von Marees Gekombineerde Skool op Okahandja aan te teken op die dag wat die vyfjarige Ingrid Maasdorp verdwyn het nie.Die inligting is vervat in ’n beëdigde verklaring wat op 2 November deur die ministerie van onderwys vernuwing, jeug, sport, kuns en kultuur se hoofbeampte vir arbeidsverhoudinge en menslike hulpbronpraktisyn, Johannes Egumbo, afgelê is. Die verklaring het gevolg op ’n versoek van die hoërhof vir dokumente wat verband hou met Ingrid se verdwyning en dood in Maart 2025.“Ek wil meld dat die bywoningsregister nie gevind kan word nie. Die onderwyseres verantwoordelik vir graad 0 by die K.W. von Maree Gekombineerde skool het die verweerder ingelig sy het die boek op die tafel gelos,” het Egumbo gesê.Volgens hom het die betrokke onderwyseres op 20 Maart 2025 nie oor ’n formele bywoningsregister beskik nie en het ’n boek gebruik om bywoning aan te teken.Egumbo het gesê die onderwyseres het nie ná die voorval na die skool teruggekeer nie. Haar plaasvervanger wat haar pligte oorgeneem het, kon nie verduidelik waar die boek is nie. Die verklaring vorm deel van ’n siviele eis van N$2,2 miljoen wat deur Ingrid se ouma, Dolly Maasdorp, teen die regering ingestel is. Maasdorp beweer nalatigheid aan die kant van die ministerie en ’n versuim om haar kleinkind te beveilig.Ingrid het op 20 Maart 2025 verdwyn nadat haar oupa haar by die skool afgelaai het waar sy ’n graad 0-leerling was. Haar liggaam is die volgende middag in ’n tonnel onder ’n brug in die Veddersdal-woonbuurt in Okahandja gevind.Volgens Maasdorp se siviele eis het die skool versuim om op die oggend van haar verdwyning voldoende toesig en sekuriteit te verskaf. ’n Goeie vriendin van die familie, wat nie bewus was van die verdwyning van die register nie, wou weet hoe dit kon verdwyn. “’n Register is iets wat ’n skool altyd het en hou, selfs al sou ’n onderwyser na ’n ander skool vertrek. In hierdie geval sal ’n mens by die ministerie moet navraag doen oor wat gebeur het,” het sy gesê. GEEN VERSLAGVolgens die regering se beëdigde verklaring het die skoolhoof ook nie ’n verslag oor Ingrid se verdwyning en dood opgestel nie.Die erkenning het gevolg op ’n versoek van die Maasdorp-familie se regsverteenwoordiger, Norman Tjombe, vir verslae wat deur die skoolhoof opgestel en ingevolge die regulasies vir basiese onderwys aan die onderwysowerhede voorgelê is.Volgens Egumbo probeer die ministerie steeds om enige verslae op te spoor wat moontlik deur die skoolhoof kragtens die regulasies uitgereik is.Hy het ook aangedui die skoolhoof kan geen rekord van haar kommunikasie met die kantoor van die onderwysdirekteur vind nie.Alhoewel geen verslag deur die skoolhoof opgestel is nie, het Egumbo bevestig die inspektoraat van die Okahandja-onderwyskring het ’n interne ondersoek gedoen en ’n verslag saamgestel. Met vertroulikheid as verweer weier die ministerie egter om die dokument openbaar te maar.“So ’n verslag is egter vertroulik. . . daarom kan die verslag nie met die eiser gedeel word nie,” het Egumbo gesê.Volgens die ministerie is ’n e-pos van die onderwysinspekteur aan die hoof-onderwysbeampte wel beskikbaar wat aan die familie verskaf sal word.Die vermiste bywoningsregister, die afwesigheid van ’n verslag deur die skoolhoof, en die weiering om die bevindinge van die interne ondersoek bekend te maak, het na vore gekom terwyl die familie dokumente probeer bekom wat relevant is tot hul eis weens beweerde nalatigheid.In ’n afsonderlike verwikkeling het die polisie in Oktober 2026 ’n deurbraak aangekondig in die ondersoek na die moorde op Ingrid en nog ’n jong slagoffer van Okahandja, Roswinds Fabianu. ’n Verdagte, die 18-jarige Karinambande Muundjua is in verband met die twee moorde in hegtenis geneem. Hy het in die landdroshof op Okahandja verskyn en die moordsaak teen hom is tot 2 Maart 2027 uitgestel. Die strafregtelike ondersoek staan apart van die familie se siviele eis van N$2,2 miljoen teen die regering. – chris@nmh-hub.com.na– aurelia@nmh-hub.com.na

Ingrid se klasregister vermis

Kommentaar

Republikein 2026-11-10

Meld asseblief aan om kommentaar te lewer

Ingrid se klasregister vermis

Kommentaar

Republikein 2026-11-10

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.