Hoërhof moet help met kampeerders

Rita Kakelo – Die regerende party, Swapo, het die hoërhof op ’n dringende basis genader en vra vir die uitsetting van ’n groep betogers wat sedert Oktober verlede jaar by sy hoofkantoor in Windhoek kamp opslaan.

Die saak is Woensdag deur regter Gabriel Komboni aangehoor. In ’n funderende beëdigde verklaring sê die party se sekretaris-generaal, Sophia Shaningwa, die aansoek is daarop gemik om die besetting onwettig te laat verklaar en ’n bevel te verkry wat die groep verplig om die perseel te ontruim.

Die respondente sluit die groepleier Joseph Amuteya, ander betogers en die munisipaliteit van Windhoek in, wat as ’n belanghebbende party aangedui word. 

Die groep, bestaande uit Namibiërs wat in 1989 uit ballingskap gerepatrieer is, eis die vrystelling van fondse en voordele eis wat hulle beweer meer as drie dekades gelede aan hulle belowe is. 

Volgens Shaningwa het die groep onder polisietoesig begin betoog voordat hulle op 22 Oktober 2025 kamp by die party se hoofkantoor opgeslaan het. Hulle het antwoorde geëis oor fondse wat hulle beweer tydens die repatriasieproses van 1989 aan Namibiërs in ballingskap toegeken is.

Sy sê dat sowel die party as verteenwoordigers van die Verenigde Nasies met die groep in gesprek getree het en volgehou het dat geen bewyse bestaan om bewerings te staaf dat sulke fondse ontvang of wanbestuur is nie. 

Ten spyte van ’n vergadering wat op 17 Januarie 2026 gehou is en ’n daaropvolgende ooreenkoms om die perseel teen 20 Januarie te verlaat, het die groep na bewering geweier om die perseel te ontruim.

“Die respondente het beide die kennisgewing om te ontruim en die uitsettingskennisgewing verontagsaam en gaan voort om die eiendom onwettig te beset,” sê Shaningwa in hofstukke.

Sy voer verder aan dat die voortgesette besetting ontwrigting veroorsaak het, sekuriteitskoste verhoog het en ’n gesondheids- en omgewingsrisiko inhou.

Die party hou ook vol dat die situasie dringend is en verwys na die beplande inwyding van sy nuwe hoofkwartier wat vir 19 April 2026 geskeduleer is, wat volgens hulle deur die voortgesette besetting in die gedrang kan kom. – [email protected]